ആധുനിക ലോകത്ത് ഒഴിവാക്കി നിർത്താൻ സാധിക്കാത്ത ഒന്നായി ഫോണുകൾ മാറിക്കഴിഞ്ഞു. ഒരു പരിധി വരെ ഇവ നമ്മുടെ സ്വകാര്യതയിലും കടന്ന് കയറിയിട്ടുണ്ട്. ആവശ്യം ഉണ്ടായിട്ടും ഇല്ലാതെയും എല്ലാം നിരവധി ആപ്ലിക്കേഷനുകളാണ് ഫോണുകളിൽ നാം സൂക്ഷിക്കുന്നത്. ഈ സാഹചര്യത്തിൽ ഉപയോക്താക്കൾക്ക് മുന്നറിയിപ്പുമായി എത്തിയിരിക്കുകയാണ് ഫേസ്ബുക്ക് മാതൃ കമ്പനി.
വളരെ സുരക്ഷിതമാണെന്ന് നാം കരുതുന്ന പസ്വേർഡുകൾ ചോർത്തുന്ന 400 ആപ്ലിക്കേഷനുകളെ കുറിച്ചാണ് മെറ്റ ഉപയോക്താക്കൾക്ക് മുന്നറിയിപ്പ് നൽകുന്നത്. ആൻഡ്രോയിഡ്, ഐഒഎസ് എന്നിവയിൽ പ്രവർത്തിക്കുന്ന ആപ്ലിക്കേഷനുകളാണ് ഇവ. ഉപയോക്താക്കളുടെ ലോഗിൻ വിവരങ്ങളാണ് ഇവർ ലക്ഷ്യമിടുന്നത്. തങ്ങളുടെ 1 ദശലക്ഷം ഫേസ്ബക്ക് ഉപയോക്താക്കളെ ഇത് സംബന്ധിച്ച വിവരം വ്യക്തിപരമായി അറിയിക്കുമെന്നും മെറ്റ വ്യക്തമാക്കുന്നു.
ഈ ആപ്ലിക്കേഷനുകള് പ്രധാനമായും ഫോട്ടോ എഡിറ്റർ, മൊബൈൽ ഗെയിമുകൾ, ഹെൽത്ത് ട്രാക്കറുകൾ എന്നീ വിഭാഗങ്ങളിലാണ് പ്രവർത്തിക്കുന്നത് . ഇത്തരം ആപ്ലിക്കേഷനുകൾ ഉപയോഗിക്കുമ്പോൾ അതിന്റെ സുരക്ഷ ഉറപ്പാക്കണമെന്ന് അധികൃതർ പറയുന്നു.
സാധാരണ ഗതിയിൽ ഏതെന്തിലും ഒരു ആപ്ലിക്കേഷൻ ഡൗൺലോഡ് ചെയ്താൽ അത് പ്രവർത്തിക്കാൻ ഫേസ്ബുക്ക് ലോഗിൻ വേണ്ടി വരും. നിർദ്ദേശങ്ങൾക്ക് അനുസരിച്ച് നാം നടപടി ക്രമങ്ങൾ പിന്തുടരുകയും ചെയ്യും. പിന്നാലെ ഉപയോക്താവിന്റെ ലോഗിൻ വിവരങ്ങൾ ഈ ആപ്ലിക്കേഷന് ലഭിക്കുകയാണ് ചെയ്യുന്നത്. ജനപ്രീതി നേടിയ ആപ്ലിക്കേഷനുകളാണ് ഇത്തരം പ്രവൃത്തികൾ ചെയ്യാൻ ഹാക്കർമാർ തിരഞ്ഞെടുക്കുന്നത്.
