ക്ലബ്ബ് ഫുട്ബോളിൽ 700 ഗോളുകൾ തികച്ച് സൂപ്പർ താരം ക്രിസ്റ്റ്യാനോ റൊണാൾഡോ. എവർട്ടനെതിരെയാണ് റൊണാൾഡോയുടെ ഗോൾ നേട്ടം. മത്സരം മാഞ്ചസ്റ്റർ യുണൈറ്റഡ് ഒന്നിനെതിരെ രണ്ട് ഗോളുകൾക്ക് ജയിച്ചു. എഴുന്നൂറ് ഗോൾ എന്ന നേട്ടം കൈവരിക്കുന്ന ആദ്യ താരമാണ് റൊണാൾഡോ.
20 വർഷങ്ങൾക്ക് മുൻപ് തന്റെ ആദ്യ ക്ലബ്ബ് ഗോൾ നേടിയ ക്രിസ്റ്റ്യാനോ റൊണാൾഡോ തൊടുത്തുവിട്ട പന്ത് 700ാം തവണയും ഗോൾ വലയെ മറികടന്നു. തുടർച്ചയായ മത്സരങ്ങളിൽ ഗോൾ നേടാനാകാതെ വിമർശനവുമായാണ് റൊണാൾഡോ ഇക്കുറി കളത്തിലിറങ്ങിയത്. എവർട്ടനെതിരെയുള്ള മത്സരത്തിൽ പകരക്കാരനായി ഇറങ്ങിയാണ് റൊണാൾഡോ തന്റെ 700ാം ഗോൾ നേടിയത്. മത്സരത്തിന്റെ 44ാം മിനിട്ടിൽ കസെമീറോയുടെ പാസിൽ നിന്നും റൊണാൾഡോ ഫിനിഷ് ചെയ്തു.
കരിയറിലെ 700 ഗോളുകളിൽ 450 എണ്ണം റയൽ മാഡ്രിഡിന് വേണ്ടി ആയിരുന്നു. മാഞ്ചസ്റ്റർ യുണൈറ്റഡിനായി 144ഉം യുവന്റസിനായി 101 ഗോളുകളും നേടി. അഞ്ച് ഗോളുകൾ തന്റെ ആദ്യ ക്ലബ്ബായ സ്പോടിങ് ലിസ്ബണായും നേടി. എവർട്ടനെതിരായ വിജയത്തോടെ മാഞ്ചസ്റ്റർ യുണൈറ്റഡ് വിജയവഴിയിലേക്ക് തിരിച്ചെത്തിയിരിക്കുകയാണ്.
മറ്റൊരു മത്സരത്തിൽ ആർസനൽ ലിവർപൂളിനെ തോൽപ്പിച്ചു. രണ്ടിനെതിരെ മൂന്ന് ഗോളുകൾക്കാണ് ആർസനൽ ലിവർപൂളിനെ തോൽപ്പിച്ചത്. 9 മത്സരങ്ങളിൽ നിന്ന് 24 പോയിന്റുമായി ആർസനലാണ് നിലവിൽ പോയിന്റ് പട്ടികയിൽ ഒന്നാമത്.
Comments