ന്യൂഡൽഹി: ഭക്തലക്ഷങ്ങളും സഞ്ചാരികളും ആകാംക്ഷയോടെ കാത്തിരിക്കുന്ന ഉജ്ജൈനിലെ മഹാകാൽ ഇടനാഴി അൽപ്പസമയത്തിനകം പ്രധാനമന്ത്രി നരേന്ദ്ര മോദി നാടിന് സമർപ്പിക്കും. രാജ്യത്തെ തന്നെ ഏറ്റവും നീളം കൂടിയ ഇടനാഴികളിൽ ഒന്നാണ് ഇത്. 900 മീറ്ററാണ് ഇതിന്റെ നീളം.
മഹാകാലേശ്വർ ക്ഷേത്ര നവീകരണ പദ്ധതിയുടെ ഒന്നാം ഘട്ട നിർമ്മാണ പ്രവർത്തനങ്ങളുടെ ഭാഗമായാണ് മഹാകാൽ ഇടനാഴി നിർമ്മിച്ചിരിക്കുന്നത്. രാജ്യത്തെ അതിപ്രധാന ശിവക്ഷേത്രങ്ങളിൽ ഒന്നായ മഹാകാലേശ്വർ ക്ഷേത്രത്തിന്റെ ഭാഗമാണ് മഹാകാലേശ്വർ ഇടനാഴി. രാജ്യത്തെ 12 ജ്യോതിർലിംഗങ്ങളിൽ ഒന്നാണ് മഹാകാലേശ്വർ ജ്യോതിർലിംഗം. ക്ഷേത്രത്തിന്റെ സമീപത്തെ രുദ്രസാഗർ തടാകവും ക്ഷേത്ര നവീകരണ പദ്ധതിയുടെ ഭാഗമായി പുനർനവീകരിക്കുന്നുണ്ട്.
ഉജ്ജൈൻ നഗരത്തിന്റെ സൗന്ദര്യവത്കരണവും ശുചീകരണവും മഹാകാലേശ്വർ ക്ഷേത്ര നവീകരണ പദ്ധതിയുടെ ഭാഗമാണ്. നഗരത്തെ തീർത്ഥാടന ടൂറിസത്തിന്റെ ഭാഗമാക്കുക എന്നതും പദ്ധതിയുടെ ലക്ഷ്യമാണ്. 2.82 ഹെക്ടർ ഉണ്ടായിരുന്ന ജ്യോതിർലിംഗ ക്ഷേത്രം, 47 ഹെക്ടർ വിസ്തൃതിയിലാണ് പുനർനവീകരിക്കുന്നത്. രുദ്രസാഗർ ക്ഷേതൃത്തിന്റെ ഭാഗമായ 17 ഹെക്ടറും പദ്ധതിയുടെ ഭാഗമായി നവീകരിക്കുന്നു.
മഹാദേവന്റെയും പാർവതീ ദേവിയുടെയും മറ്റ് ദേവീ ദേവന്മാരുടെയും ഇരുനൂറിൽപ്പരം ശിൽപ്പങ്ങൾ ഇടനാഴിയുടെ വിവിധ ഭാഗങ്ങളിൽ സ്ഥാപിച്ചിട്ടുണ്ട്. ഇടനാഴിയുടെ പ്രവേശന കവാടത്തിന്റെ സമീപത്തായി നന്ദി ദ്വാർ, പിനാകി ദ്വാർ എന്നിങ്ങനെ മനോഹരമായ രണ്ട് ഗോപുരവാതിലുകളും പണികഴിപ്പിച്ചിട്ടുണ്ട്.
മനോഹരമായ 108 കൽമണ്ഡപങ്ങൾ, ജലധാരകൾ, ശിവപുരാണത്തിലെ വിവിധ കഥാസന്ദർഭങ്ങൾ വിവരിക്കുന്ന അൻപതോളം ഛായാചിത്രങ്ങൾ എന്നിവ ഇടനാഴിയുടെ സുപ്രധാന ആകർഷണങ്ങളിൽ ഒന്നാണ്.
മഹാകാലേശ്വർ ക്ഷേത്ര നവീകരണ പദ്ധതിയുടെ അടുത്ത ഘട്ടത്തിൽ യോഗാ കേന്ദ്രം, കാഴ്ച ബംഗ്ലാവ് എന്നിവ ഉൾപ്പെടുന്ന വിനോദ കേന്ദ്രം നിർമ്മിക്കും. പദ്ധതിക്കായി മദ്ധ്യപ്രദേശ് സർക്കാർ 856 കോടി രൂപയാണ് ചിലവഴിക്കുക. തീർത്ഥാടകർക്കും സഞ്ചാരികൾക്കുമായി 23.90 കോടി രൂപ ചിലവിൽ അടിസ്ഥാന സൗകര്യങ്ങളും വികസിപ്പിക്കുന്നുണ്ട്. 316 കോടി രൂപ പദ്ധതിയുടെ ഒന്നാം ഘട്ടത്തിന് വേണ്ടി മാത്രമായി ചിലവാകും.
Jai Mahakal 🔱
The first phase of the Shree Mahakaleshwar Temple Corridor of Ujjain is all set to be inaugurated by Hon’ble PM Shri @narendramodi Ji tomorrow 11th, October.
Glimpse of the magnificent #ShriMahakalLok :
(1/2) pic.twitter.com/8zTQoPoTiF
— Ministry of Tourism (@tourismgoi) October 10, 2022
