അവിവാഹിതരായി നടക്കുന്ന യുവാക്കൾക്ക് ഉപദേശങ്ങളുമായി മുതിർന്നവർ എത്തുന്നത് പതിവാണ്.. കൗമാരക്കാർക്ക് പലപ്പോഴും പ്രണയത്തെക്കുറിച്ചുള്ള ഉപദേശങ്ങളായിരിക്കും ലഭിക്കുക. ബന്ധുക്കളും സുഹൃത്തുക്കളും മാത്രമല്ല വഴിപോക്കർ വരെ ‘ഡേറ്റിംഗ് അഡ്വൈസ്’ നൽകുന്ന ഇക്കാലത്ത് ഒരു രാജ്യത്തിന്റെ തലവൻ അത്തരമൊരു ഉപദേശം നൽകുമെന്ന് കരുതുന്നുണ്ടോ.. ? എന്നാലിതാ കേട്ടോളൂ.. കൗമാരക്കാരിക്ക് പ്രണയോപദേശം നൽകി വൈറലായിരിക്കുകയാണ് അമേരിക്കൻ പ്രസിഡന്റായ ജോ ബൈഡൻ.
ജനക്കൂട്ടത്തിനിടയിൽ നിൽക്കുകയായിരുന്ന ഒരു പെൺകുട്ടിക്കായിരുന്നു ബൈഡൻ ഉപദേശം നൽകിയത്. അമേരിക്കൻ പ്രസിഡന്റിനോടൊപ്പം സെൽഫിയെടുക്കാൻ എത്തിയവരുടെ കൂട്ടത്തിലുണ്ടായിരുന്ന പെൺകുട്ടിയായിരുന്നു അത്. ഫോട്ടോ എടുത്തതിന് ശേഷം 79-കാരനായ ബൈഡൻ പെൺകുട്ടിയുടെ തോൾ ചേർത്ത് പിടിച്ച് ഉപദേശിച്ചു. ‘പ്രായം 30 എത്തുന്നത് വരെ പങ്കാളികൾ വേണ്ട, ഇതെന്റെ പെൺമക്കളോടും കൊച്ചുമക്കളോടും ഞാൻ പറയാറുള്ളതാണ്’ എന്നായിരുന്നു (no serious guys till 30) ബൈഡന്റെ വാക്കുകൾ. ഇതുകേട്ട് സ്തബ്ധയായ പെൺകുട്ടി ഒരു നിമിഷം നിശ്ചലയായി നിൽക്കുകയും പിന്നീട് ‘അങ്ങനെയാകട്ടെ’യെന്ന് ബൈഡനോട് മറുപടി പറയുകയുമായിരുന്നു. ഇതെല്ലാം മൊബൈലിൽ പകർത്തിയിരുന്ന യുവാവിനെ പ്രസിഡന്റിന്റെ അനുയായികൾ തടയാൻ ശ്രമിക്കുന്നതും വീഡിയോയിൽ കാണാം.
ഇർവൈൻ വാലി കോളേജിൽ വിദ്യാർത്ഥികളോട് സംസാരിക്കാൻ ബൈഡൻ എത്തിയപ്പോഴാണ് ഇതുണ്ടായതെന്നാണ് റിപ്പോർട്ട്. ട്വിറ്ററിൽ 5.1 ദശലക്ഷം കാഴ്ചക്കാരുണ്ടായ ഈ വീഡിയോയ്ക്ക് താഴെ പ്രസിഡന്റിനെ അനുകൂലിച്ചും പ്രതികൂലിച്ചുമുള്ള പ്രതികരണങ്ങളാണ് ഉയർന്നത്. എത്ര എളിമയുള്ള മനുഷ്യനെന്ന് ചിലർ അഭിപ്രായപ്പെട്ടപ്പോൾ അമേരിക്കൻ പ്രസിഡന്റ് ഇടപെടേണ്ട കാര്യമല്ല അതെന്നായിരുന്നു മറ്റ് ചിലർ വിമർശിച്ചത്. പ്രസിഡന്റിന് കൈകാര്യം ചെയ്യാൻ എത്രയോ വിഷയങ്ങൾ രാജ്യത്തുണ്ടെന്നും ചിലർ ചോദിച്ചു.
വൈറലായ വീഡിയോ കാണാം..
President Joe Biden grabs a young girl by the shoulder and tells her “no serious guys till your 30” as she looks back appearing uncomfortable, secret service appears to try to stop me from filming it after Biden spoke @ Irvine Valley Community College | @TPUSA @FrontlinesShow pic.twitter.com/BemRybWdBI
— Kalen D’Almeida (@fromkalen) October 15, 2022
