ഓൺലൈൻ ലോകത്ത് ഒപ്റ്റിക്കൽ ഇല്യൂഷൻ ചിത്രങ്ങൾക്ക് ഏറെ ആരാധകരാണുള്ളത്. ഒരു കൊച്ചു ചിത്രത്തിനുള്ളിൽ ഒളിഞ്ഞിരിക്കുന്ന മാസ്മരികതയെ നിമിഷങ്ങൾക്കകം കണ്ടെത്താൻ ഇഷ്ടപ്പെടുന്നവരാണ് മിക്കവരും. കുട്ടികളെയും മുതിർന്നവരെയും ഒരുപോലെ ചിന്തിപ്പിക്കുന്ന ഇത്തരം ചിത്രങ്ങൾ പലപ്പോഴും ഉത്തരം കണ്ടെത്താൻ കഴിയാതെ ചോദ്യചിഹ്നമായി തുടരാറുണ്ട്. ഇപ്പോഴിതാ ആളുകളെ കുഴക്കിയ ഒരു ചിത്രം സോഷ്യൽമീഡിയയിൽ വൈറലാകുകയാണ്.
വെള്ള നിറം പൂശിയ മനോഹരമായ ഒരു വീടാണ് ചിത്രത്തിലുള്ളത്. അതിമനോഹരമായ രണ്ട് നീല വാതിലുകളും ചിത്രത്തിൽ കാണാം. വീട്ടുമുറ്റത്ത് പൂത്തുലഞ്ഞുനിൽക്കുന്ന ഒരു മരവുമുണ്ട്. പിങ്ക് നിറത്തിലുള്ള പൂക്കൾ ഈ മരത്തിൽ നിറഞ്ഞുനിൽക്കുകയാണ്. ഈ ചിത്രത്തിൽ ഒളിഞ്ഞിരിക്കുന്ന പാമ്പിനെ കണ്ടെത്തണമെന്നതാണ് കാഴ്ചക്കാർക്കുള്ള ടാസ്ക്. ഏഴ് സെക്കൻഡുകൾക്കുള്ളിൽ കണ്ടെത്താൻ കഴിയുന്നവർക്ക് അപാര നിരീക്ഷണപാടവമുണ്ടെന്നും അവകാശപ്പെടുന്നുണ്ട്.
എന്നാൽ എത്രസമയം ചിലവഴിച്ചിട്ടും ചിലർക്ക് ഈ ചിത്രത്തിലെ പാമ്പിനെ കണ്ടെത്താനായില്ല. കാരണം ഒറ്റ നോട്ടത്തിൽ കണ്ടെത്താൻ സാധിക്കാത്ത വിധത്തിലാണ് പാമ്പിനെ ചിത്രീകരിച്ചിട്ടുള്ളത്. ചിത്രത്തിൽ പൂക്കൾ നിറഞ്ഞുനിൽക്കുന്ന ഭാഗത്താണ് പാമ്പ് കിടക്കുന്നത്. മരത്തിന്റെ ശിഖരങ്ങൾക്ക് സമാനമായ രീതിയിൽ ചുറ്റിപ്പിണഞ്ഞ് കിടക്കുന്നതിനാലാണ് ഒറ്റനോട്ടത്തിൽ പലർക്കും പാമ്പിനെ കണ്ടെത്താൻ പ്രയാസം തോന്നിയത്. ശിഖരങ്ങളുടെ നിറവും പാമ്പിന്റെ നിറവും ഒന്നു തന്നെയായതിനാൽ തിരിച്ചറിയാൻ പ്രയാസം തോന്നുന്നത് സ്വാഭാവികമാണ്.
ഇത്തരം ഒപ്റ്റിക്കൽ ഇല്യൂഷൻ ചിത്രങ്ങൾ പലപ്പോഴും ഫോട്ടോഷോപ്പ് ഉൾപ്പെടെയുള്ള ടൂളുകളുടെ സഹായത്തോടെയാണ് തയ്യാറാക്കുന്നത്. എന്നാൽ മറ്റ് ചില ചിത്രങ്ങൾ ക്യാമറയിൽ പകർത്തുന്ന ആംഗിളിന്റെ പ്രത്യേകത കൊണ്ട് സംഭവിച്ചുപോകാറുമുണ്ട്. ഇവയെല്ലാം തന്നെ സോഷ്യൽ മീഡിയയിൽ ചർച്ചയാകുന്നത് പതിവാണ്.
