ന്യൂഡൽഹി: ഡൽഹിയിൽ ദീപാവലി ആഘോഷങ്ങൾക്ക് നിയന്ത്രണം ഏർപ്പെടുത്തി ആം ആദ്മി പാർട്ടി സർക്കാർ. പടക്കങ്ങളുടെ നിർമ്മാണവും വിൽപ്പനയും ഉപയോഗവും നിരോധിച്ചു. കഴിഞ്ഞ വർഷങ്ങളിലും ഡൽഹിയിൽ ദീപാവലിക്ക് പടക്കം പൊട്ടിക്കാൻ അനുവാദം ഉണ്ടായിരുന്നില്ല.
പടക്കങ്ങളുടെ നിർമ്മാണവും വിൽപ്പനയും കുറ്റകരമാക്കിയതായി ഡൽഹി പരിസ്ഥിതി വകുപ്പ് മന്ത്രി ഗോപാൽ റായ് അറിയിച്ചു. വിലക്ക് ലംഘിച്ച് പടക്കങ്ങൾ ഉണ്ടാക്കുകയോ സംഭരിക്കുകയോ വിൽക്കുകയോ ചെയ്യുന്നത് ശ്രദ്ധയിൽ പെട്ടാൽ അയ്യായിരം രൂപ പിഴയോ മൂന്ന് വർഷം തടവോ രണ്ടും കൂടി ഒരുമിച്ചോ അനുഭവിക്കേണ്ടി വരുമെന്ന് മന്ത്രി പറഞ്ഞു. പടക്കങ്ങൾ വാങ്ങുകയോ പൊട്ടിക്കുകയോ ചെയ്താൽ, 200 രൂപ പിഴയും ആറ് മാസം വരെ തടവും ലഭിക്കുമെന്നും മന്ത്രി അറിയിച്ചു.
ദീപാവലി ഉൾപ്പെടെ വിവിധ ആഘോഷങ്ങൾ നടക്കാനിരിക്കുന്ന പശ്ചാത്തലത്തിൽ, ജനുവരി 1 വരെയാണ് ഡൽഹിയിൽ പടക്കങ്ങൾക്ക് നിരോധനം ഏർപ്പെടുത്തിയിരിക്കുന്നത്.
