പാമ്പുകൾ എന്നും മനുഷ്യന് പേടിയുള്ള ജീവികളാണ്. അപ്പുറത്തെ പറമ്പിലൂടെ പാമ്പ് പോകുന്നുണ്ടെന്ന് കേട്ടാൽ പോലും വീടിനകത്തേക്ക് ഓടുന്നവരാണ് പലരും. ചിലരാണെങ്കിൽ അതിനെ കൊല്ലാൻ വടിയുമെടുത്ത് ഇറങ്ങും. എന്നാൽ പാമ്പുകളെ ഒരിക്കലും പേടിക്കേണ്ട കാര്യമില്ലെന്ന് പറഞ്ഞ് കേരളത്തിലെ ജനങ്ങളിൽ അവബോധം വളർത്തിയയാളാണ് വാവ സുരേഷ്. ബോധവത്ക്കരണ ക്ലാസുകളിലൂടെയും മറ്റും പാമ്പുകൾ മനുഷ്യന്റെ ശത്രുവല്ലെന്നും മിത്രമാണെന്നും വാവ സുരേഷ് ബോധ്യപ്പെടുത്തി.
ഇത്തരത്തിൽ നടത്തിയ ക്ലാസിനിടെ പാമ്പിനെ തലയിൽ ചുംബിക്കുന്ന വാവ സുരേഷിന്റെ വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ വീണ്ടും പ്രചരിക്കുന്നത്. സാധാരണ പാമ്പല്ല, രാജ വെമ്പാല തന്നെ. അതെ, രാജവെമ്പാലയുടെ തലയിലാണ് വാവ സുരേഷ് ഉമ്മവെച്ചത്.
ജാഗ്രതയോടെയിരിക്കുന്ന രാജവെമ്പാലയുടെ തലയിൽ പിന്നിൽ നിന്നാണ് വാവ സുരേഷ് ഉമ്മവെയ്‌ക്കുന്നത്. വീഡിയോയ്‌ക്ക് പ്രതികരണവുമായി നിരവധി പേർ എത്തിയിട്ടുണ്ട്. വളരെ അപകടകാരിയായ പാമ്പിനെ സൂക്ഷ്മമായിട്ടാണ് അദ്ദേഹം ചുംബിക്കുന്നത് എന്നാണ് ചിലർ പറയുന്നത്. മറ്റ് ചിലർ ഇത്തരം പ്രവൃത്തികൾ ചെയ്യരുത് എന്നും അഭ്യർത്ഥിക്കുന്നുണ്ട്.
അതേസമയം വാവ സുരേഷ് വാഹനാപകടത്തിൽ പരിക്കേറ്റ് ചികിത്സയിലാണ്. വാവാ സുരേഷ് സഞ്ചരിച്ച കാർ കെ.എസ്.ആർ.ടി.സി ബസുമായി കൂട്ടിയിടിച്ചതിനെ തുടർന്നാണ് പരിക്കേറ്റത്.
Comments