ട്വിറ്ററിൽ നിരവധി പേരുടെ ആകാംക്ഷ പിടിച്ചുപറ്റി വൈറലാകുകയാണ് ഒരു വീഡിയോ. ട്രക്കിൽ അതിവേഗം ലോഡ് നിറയ്ക്കുന്നതാണ് വീഡിയോയിലുള്ളത്. കൃഷിസ്ഥലത്ത് നിന്നും അപ്പപ്പോൾ പറിച്ചെടുത്ത തക്കാളി ലോറിയിൽ നിറയ്ക്കുന്നതാണ് വീഡിയോയിലുള്ളത്. ഇതിൽ ഇത്രമാത്രം പ്രത്യേകത എന്തിരിക്കുന്നുവെന്ന് ചിന്തിക്കാൻ വരട്ടെ.. എപ്രകാരമാണ് തൊഴിലാളി ഈ ലോഡ് നിറയ്ക്കുന്നത് എന്നുള്ളതാണ് നിരവധി പേരുടെ അഭിനന്ദനങ്ങൾക്കിടയാക്കിയത്.
Power of Arnold, brain of Einstein pic.twitter.com/3W0dL3c1Dt
— Sagar (@sagarcasm) October 18, 2022
തക്കാളി നിറച്ച ബക്കറ്റ് കയ്യിലെടുത്ത് ലോറിയിലേക്ക് എറിയുകയാണ് തൊഴിലാളി. എന്നാൽ ബക്കറ്റിലെ തക്കാളി വീഴുന്നത് ലോറിയിലും ബക്കറ്റ് വീഴുന്നത് ലോറിക്ക് പുറത്തുമാണ്. ഒറ്റയേറിൽ രണ്ടുകാര്യവും എങ്ങനെ സാധ്യമാക്കുന്നുവെന്നതാണ് വീഡിയോ കാണുന്ന ഏതൊരാളെയും അതിശയിപ്പിക്കുന്നത്. അർണോൾഡ് ഷ്വാർസ്നഗറിന്റെ ശക്തിയും ഐൻസ്റ്റീനിന്റെ ബുദ്ധിയുമാണ് ആ തൊഴിലാളിക്കുള്ളതെന്ന് ട്വിറ്റർ ഉപയോക്താക്കൾ പുകഴ്ത്തി. അതുകൊണ്ട് തന്നെ വെറും 14 സെക്കൻഡ് മാത്രമുള്ള ഈ വീഡിയോ 10 ദശലക്ഷത്തിലധികം കാഴ്ചക്കാരെ നേടിക്കഴിഞ്ഞു.
കൃത്യത, വേഗത എന്നിവയെ ശരിയായ അനുപാതത്തിൽ ലയിപ്പിക്കാനുള്ള വൈദഗ്ധ്യമാണ് തൊഴിലാളിക്കുള്ളതെന്നും ഈ മിടുക്കിനാധാരം ജോലിയോടുള്ള ആത്മാർത്ഥതാ മനോഭാവമാണെന്നും വീഡിയോ കണ്ടവർ പ്രതികരിച്ചു. തൊഴിലാളി അവന്റെ ജോലി എളുപ്പമാക്കാൻ കണ്ടെത്തിയ മാർഗം എത്രമാത്രം സമയം ലാഭിക്കാൻ സഹായിക്കുന്നുവെന്നും അദ്ധ്വാനശീലർ ഈ സ്വഭാവസവിശേഷതയാണ് കൈവരിക്കേണ്ടതെന്നുമാണ് പലരുടെയും അഭിപ്രായം. ഒക്ടോബർ 18ന് പോസ്റ്റ് ചെയ്യപ്പെട്ട ഈ വീഡിയോ യഥാർത്ഥത്തിൽ എവിടെ നടന്നതാണെന്ന് ആർക്കും വ്യക്തമല്ല.
