തിരുവനന്തപുരം: ലഹരിക്കെതിരെ ദീപം തെളിയിച്ച് പോരാടണമെന്ന എക്സൈസ് മന്ത്രി എം ബി രാജേഷിന്റെ ആഹ്വാനത്തിന്റെ പശ്ചാത്തലത്തിൽ, പൊതുമരാമത്ത് വകുപ്പ് മന്ത്രി മുഹമ്മദ് റിയാസിന്റെ പഴയ ഫേസ്ബുക്ക് പോസ്റ്റ് കുത്തിപ്പൊക്കി ട്രോളന്മാർ. കൊറോണ വ്യാപനക്കാലത്ത്, കൊവിഡ് പോരാളികളായ ആരോഗ്യ പ്രവർത്തകരെ ആദരിക്കുന്നതിന്റെ ഭാഗമായി ദീപം തെളിയിക്കാൻ പ്രധാനമന്ത്രി നരേന്ദ്ര മോദി ആഹ്വാനം ചെയ്തിരുന്നു. ഇതിനെതിരെ മുഹമ്മദ് റിയാസ് ഇട്ട പോസ്റ്റ് ആണ് ഇന്ന് ട്രോളുകൾ ഏറ്റുവാങ്ങുന്നത്.
വിഡ്ഢിത്തങ്ങൾ അംഗീകാരമാക്കി മാറ്റുവാൻ ആഘോഷമാക്കുന്നവരോട്, എന്ന് തുടങ്ങുന്ന ഫേസ്ബുക്ക് പോസ്റ്റിൽ പ്രധാനമന്ത്രി നരേന്ദ്ര മോദി, മറ്റ് കേന്ദ്ര മന്ത്രിമാർ എന്നിവരെ മുഹമ്മദ് റിയാസ് ആക്ഷേപിച്ചിരുന്നു. ഞങ്ങൾ വെളിച്ചത്തിന്റെ സ്വിച്ച് ഓഫ് ചെയ്യാൻ തയ്യാറാണ്, നിങ്ങൾ എന്നാണ് നിങ്ങളുടെ തലച്ചോറിലെ വെളിച്ചത്തിന്റെ സ്വിച്ച് ഓൺ ചെയ്യുക” എന്ന ചോദ്യത്തോടെയായിരുന്നു റിയാസിന്റെ പോസ്റ്റ് അവസാനിച്ചത്.
എന്നാൽ, പ്രധാനമന്ത്രിയുടെ ആഹ്വാനം ഏറ്റെടുത്ത് ദീപം തെളിയിക്കാൻ അന്ന് മുഖ്യമന്ത്രിയും നിർദ്ദേശം നൽകിയതോടെ, റിയാസിന്റെ പോസ്റ്റിന് താഴെ ട്രോളുകളും പരിഹാസ കമന്റുകളും നിറഞ്ഞിരുന്നു. റിയാസിന്റെ പ്രസ്തുത ഫേസ്ബുക്ക് പോസ്റ്റാണ്, ഇന്ന് എം ബി രാജേഷിനെതിരായ ട്രോളായി മാറുന്നത്.
മയക്കുമരുന്നിനെതിരെയുള്ള ബോധവത്കരണത്തിന്റെ ഭാഗമായി തിങ്കളാഴ്ച വൈകീട്ട് ആറ് മണിക്ക് സംസ്ഥാനത്തെ എല്ലാ വീടുകളിലും ദീപം തെളിയിക്കണമെന്നായിരുന്നു എം ബി രാജേഷിന്റെ ആഹ്വാനം. ഞായർ, തിങ്കൾ ദിവസങ്ങളിൽ സംസ്ഥാനത്തെ എല്ലാ ഗ്രന്ഥശാലകളിലും ദീപം തെളിയിക്കുന്ന പരിപാടി നടത്താനും സർക്കാർ തീരുമാനിച്ചിരുന്നു.
മുഹമ്മദ് റിയാസിന്റെ ഫേസ്ബുക്ക് പോസ്റ്റ്: https://www.facebook.com/PAMuhammadRiyas/posts/pfbid02uEXLCVZ6EXMvdp3wEgKbkvo1tty5DAv2LkD9aVXXsiTGjvczU7r3zXtAzG5Cfu5Ll
