പ്രണയിനിയോട് വിവാഹാഭ്യർത്ഥന നടത്തുന്ന നിരവധി വീഡിയോകൾ നമ്മൾ കാണാറുണ്ട്. ചിലർ വിവാഹാഭ്യർത്ഥന സ്വകാര്യമായി നടത്തുമ്പോൾ മറ്റു ചിലർ പരസ്യമായി തന്നെ താൽപര്യം തുറന്നു കാണിക്കുന്നു. കായിക മത്സരങ്ങൾ നടക്കുമ്പോൾ കാണികൾക്കിടയിൽ ഇത് സർവ്വസാധാരണമാണ്. ഇപ്പോൾ സമൂഹമാദ്ധ്യമങ്ങളിൽ ശ്രദ്ധ നേടുന്നതും അത്തരം ഒരു വിവാഹാഭ്യർത്ഥനയുടെ വീഡിയോയാണ്.
സിഡ്നി ക്രിക്കറ്റ് ഗ്രൗണ്ടിൽ ഇന്ത്യയും നെതർലൻഡ്സും തമ്മിലുള്ള ട്വന്റി20 മത്സരം നടക്കുമ്പോഴായിരുന്നു മനോഹരമായ ആ കാഴ്ച. ഇന്ത്യക്കാരനായ ഒരു യുവാവ് തന്റെ കാമുകിയോട് ജനങ്ങളുടെ മുന്നിൽ പരസ്യമായി വിവാഹാഭ്യർത്ഥന നടത്താൻ തീരുമാനിക്കുന്നു. എല്ലാവരുടെയും ശ്രദ്ധ പിടിച്ചു പറ്റിയ ശേഷം പ്രണയിനിക്ക് മുന്നിൽ മുട്ടു കുത്തിയിരുന്ന് യുവാവ് മോതിരം നീട്ടി. സന്തോഷം കൊണ്ട് കണ്ണുനിറഞ്ഞ യുവതി വിവാഹാഭ്യർത്ഥനയെ ഹൃദയം കൊണ്ട് സ്വീകരിക്കുകയാണ്.
മോതിരം വിരലിൽ അണിയിച്ച ശേഷം ഇരുവരും കെട്ടിപിടിക്കുന്നതും സന്തോഷം പങ്കുവെയ്ക്കുന്നതും വീഡിയോയിൽ കാണാം. കാണികൾ കൈയടിച്ചും പ്രോത്സാഹിപ്പിച്ചുമാണ് ഈ മനോഹര മുഹൂർത്തത്തെ വരവേറ്റത്. ഇതിനോടകം ലക്ഷങ്ങളാണ് വീഡിയോ കണ്ടത്. ഇന്ത്യയും നെതർലൻഡ്സും തമ്മിലുള്ള മത്സരത്തിനിടെ യുവാവ് കാമുകിയോട് വിവാഹാഭ്യർത്ഥന നടത്തി
Comments