ഇസ്ലാമാബാദ്: ലോകമെങ്ങും ആരാധകരുള്ള ക്രിക്കറ്റ് താരമാണ് ഇന്ത്യൻ ബാറ്റർ വിരാട് കോഹ്‌ലി. കോടിക്കണക്കിന് ക്രിക്കറ്റ് പ്രേമികളുടെ മനസിൽ ഇടംപിടിച്ച താരത്തിന് പാകിസ്താനിൽ നിന്നുള്ള ഒരു ആരാധകൻ നൽകിയ സ്‌നേഹ സമ്മാനമാണ് ഇപ്പോൾ വൈറലാകുന്നത്.
കഴിഞ്ഞയാഴ്ച ഇന്ത്യയ്‌ക്കെതിരായി നടന്ന മത്സരത്തിൽ പാകിസ്താൻ പരാജയപ്പെട്ടെങ്കിലും പാക് ക്രിക്കറ്റ് ആരാധകർക്ക് കണ്ടില്ലെന്ന് നടിക്കാൻ കഴിയാത്ത ഒന്നായിരുന്നു കോഹ്‌ലിയുടെ അതിഗംഭീര പ്രകടനം. ഇതിനോടുള്ള ആദരസൂചകമായാണ് പാക് പ്രവിശ്യകളിലൊന്നായ ബലൂചിസ്ഥാനിൽ നിന്നും ഒരു ക്രിക്കറ്റ് ആരാധകൻ കോഹ്‌ലിക്ക് ആദരവുമായി എത്തിയത്.
https://twitter.com/i/status/1586222076502974464
മണലിൽ കോഹ്‌ലിയുടെ ചിത്രം വരച്ചായിരുന്നു പാക് പൗരൻ തന്റെ ആദരവ് അറിയിച്ചത്. ബലൂചിസ്ഥാനിലെ ഗദ്ദാനിയിൽ നിന്നുള്ള മണൽ കലാകാരനാണ് വിരാട് കോഹ്‌ലിയോടുള്ള തന്റെ സ്‌നേഹം ലോകത്തെ ഇപ്രകാരം അറിയിച്ചത്. ട്വിറ്ററിൽ ചിത്രം പങ്കുവെച്ചതോടെ ബലൂചിൽ നിന്നുള്ള കലാസൃഷ്ടി വൈറലാകുകയായിരുന്നു.
https://twitter.com/IFazilaBaloch/status/1586014679335284739
പാകിസ്താനെതിരായ ടി20 ലോകകപ്പ് മത്സരത്തിൽ വിരാട് കോഹ്‌ലി 82 റൺസ് നേടുകയും, ഇന്ത്യ നാല് വിക്കറ്റിന് ജയിക്കുകയും ചെയ്തിരുന്നു. കോഹ്‌ലിയുടെ അത്യുഗ്രൻ പ്രകടനത്തിന് ആദരവായാണ് ക്രിക്കറ്റ് ആരാധകനായ പാക് പൗരൻ മണലിൽ അതിമനോഹരമായ കോഹ്‌ലിയുടെ രൂപം വരച്ചത്. അതിർത്തി കടന്നുള്ള ഈ ക്രിക്കറ്റ് പ്രേമത്തെ ലോകമെങ്ങും വാഴ്‌ത്തി പാടുകയാണ്.
