സിഡ്നി: ഇന്ത്യയുടെ സൂര്യകുമാർ യാദവ് ബാബർ അസമിനെക്കാളും മുഹമദ് റിസ്വാനെക്കാളും മികച്ച പ്രകടനമാണ് നടത്തുന്നതെന്ന് മുൻ പാക് താരം ഡാനിഷ് കനേരിയ. തന്റെ ഔദ്യോഗിക യൂട്യൂബ് ചാനലിലാണ് മുൻ സ്പിൻ ബൗളർ ആയ കനേരിയ തന്റെ നാട്ടുകാരായ താരങ്ങളെ വിമർശിച്ചും യാദവിനെ പുകഴ്ത്തിയും രംഗത്ത് വന്നത്.
മുബൈക്കാരനായ സൂര്യകുമാർ ഐസിസി ടി20 റാങ്കിങിൽ മൂന്നാമനാണ്. പാക് താരങ്ങളായ ബാബറും റിസ്വാനും സ്വന്തം നേട്ടങ്ങൾ നിലനിർത്താനാണ് കളിക്കുന്നത്. പാക് ക്യാപ്റ്റനായ ബാബറിനേക്കാൾ സൂര്യകുമാർ വളരെ മുന്നിലാണെന്നും കനേരിയ വിലയിരുത്തി. യാദവ് വ്യക്തിഗത നേട്ടങ്ങൾക്ക് വേണ്ടിയല്ലെന്നും സ്വന്തം രാജ്യത്തിന് വേണ്ടിയാണ് കളിക്കുന്നതെന്നും മുൻ അന്താരാഷ്ട്ര താരം വ്യക്തമാക്കി. കഴിഞ്ഞ രണ്ട് മത്സരങ്ങളിലും അസമും റിസ്വാനും മോശം പ്രകടനമാണ് നടത്തിയത്. അതിന്റെ പശ്ചാത്തലത്തിലാണ് കനേരിയയുടെ വീഡിയോ.
സൂര്യകുമാർ യാദവ് വളരെ തീവ്രതയോടെയാണ് കളിക്കുന്നതെന്നും ബാബറിലും റിസ്വാനിലും നിന്ന് വ്യത്യസ്തമായി അദ്ദേഹം തന്റെ രാജ്യത്തിന് വേണ്ടിയാണ് കളിക്കുന്നതെന്നും കനേരിയ പറഞ്ഞു. പാകിസ്താൻ മികച്ച പ്രകടനം കാഴ്ചവെക്കുന്നതിന് രണ്ട് കളിക്കാരും തങ്ങളുടെ ഓപ്പണിംഗ് സ്ലോട്ടുകൾ ഉപേക്ഷിക്കണമെന്ന് മുൻ സ്പിന്നർ നിർദ്ദേശിച്ചു. ഐസിസി റാങ്കിംഗ് നിലനിർത്താൻ ആഗ്രഹിക്കുന്നതിനാൽ തങ്ങളുടെ ഓപ്പണിംഗ് സ്ഥാനം ഉപേക്ഷിക്കാൻ ഇവർ ആഗ്രഹിക്കുന്നില്ലെന്നും അദ്ദേഹം പറഞ്ഞു. സൂര്യകുമാർ യാദവ് അസമിനേക്കാൾ ആയിരം മടങ്ങ് മികച്ചതാണെന്നും കനേരിയ വീഡിയോവിൽ സാക്ഷ്യപ്പെടുത്തി.
