പെർത്ത്: അഭിമാന നേട്ടം സ്വന്തമാക്കി വിരാട് കോഹ്ലി. ഐസിസി ടി-20 ലോകകപ്പ് ചരിത്രത്തിൽ 1,000 റൺസ് പൂർത്തിയാക്കിയാണ് കോഹ്ലി വീണ്ടും രാജ്യത്തിന്റെ യശസ്സ് വാനോളമുയർത്തിയത്. ടി-20 ലോകകപ്പിൽ 1,000 റൺസ് പൂർത്തിയാക്കുന്ന രണ്ടാമത്തെ താരമാണ് കോഹ്ലി. ശ്രീലങ്കൻ താരം മഹേല ജയവർധനെയാണ് ഐസിസി ടി20 ലോകകപ്പിൽ 1000 റൺസ് നേടിയിട്ടുള്ള ആദ്യ താരം. 31 ഇന്നിങ്സിൽ നിന്നും ഒരു സെഞ്ചുറിയും 6 ഫിഫ്റ്റിയും ഉൾപ്പടെ 39.07 ശരാശരിയിൽ 1016 റൺസാണ് ജയവർധനെ നേടിയിട്ടുള്ളത്.
പെർത്തിൽ ദക്ഷിണാഫ്രിക്കയ്ക്കെതിരായ ഇന്ത്യയുടെ മത്സരത്തിനിടെയാണ് കോഹ്ലി ഈ നാഴികക്കല്ല് പിന്നിട്ടത് .ദക്ഷിണാഫ്രിക്കയ്ക്കെതിരെ 11 പന്തിൽ നിന്ന് രണ്ട് ബൗണ്ടറികളടക്കം 12 റൺസ് മാത്രമേ കൊഹ് ലിക്ക് നേടാൻ കഴിഞ്ഞിരുന്നുളളൂ. എന്നാൽ ഇതിനിടയിലാണ് ചരിത്രനേട്ടവും താണ്ടിയത്. 22 ഇന്നിംഗ്സിൽ നിന്നും 12 ഫിഫ്റ്റി ഉൾപ്പടെ 83.41 ശരാശരിയിൽ 1001 റൺസാണ് കോഹ്ലിയുടെ ടി-20 ലോകകപ്പിലെ സമ്പാദ്യം. 965 റൺസ് നേടിയ മുൻ വിൻഡീസ് താരം ക്രിസ് ഗെയ്ലും 919 റൺസ് നേടിയിട്ടുള്ള ഇന്ത്യൻ ക്യാപ്റ്റൻ രോഹിത് ശർമ്മയും ഈ പട്ടികയിൽ വിരാട് കോഹ്ലിക്ക് തൊട്ടുപിന്നാലെയുണ്ട്.
ടി20 ലോകകപ്പിൽ ഏറ്റവും കൂടുതൽ അർദ്ധസെഞ്ച്വറി (12) നേടിയ താരമെന്ന റെക്കോർഡ് കോഹ്ലിയുടെ പേരിലാണ്.ടി 20 ടൂർണമെന്റുകളിൽ ഇതുവരെ ഏറ്റവും കൂടുതൽ റൺസ് നേടിയ താരവും കൊഹ്ലിയാണ്. 112 മത്സരങ്ങളിൽ നിന്ന് 3868 റൺസാണ് താരം നേടിയിട്ടുളളത്.
നിലവിൽ ദക്ഷിണാഫ്രിക്കയ്ക്കെതിരെയ മത്സരത്തിൽ ഇന്ത്യയ്ക്ക് ആറ് വിക്കറ്റ് നഷ്ടമായി.
Comments