കൊച്ചി: സംസ്ഥാനത്ത് പ്രണയത്തെ ചൊല്ലിയുണ്ടായ കൊലപാതകങ്ങളിൽ അതൃപ്തി രേഖപ്പെടുത്തി നടൻ ഹരീഷ് പേരടി. പ്രണയം എന്തെന്ന് മനുഷ്യർ ശരിയായി പഠിക്കേണ്ടത് അത്യാവശ്യമാണെന്ന് നടൻ വ്യക്തമാക്കി. പ്രണയം എന്തെന്ന് പാഠ്യപദ്ധതിയിൽ ഉൾപ്പെടുത്തണമെന്നും സമയം അതിക്രമിച്ചെന്നും അദ്ദേഹം കൂട്ടിച്ചേർത്തു.
കണ്ണൂരിൽ പ്രണയനൈരാശ്യത്തെ തുടർന്ന് വിഷ്ണുപ്രിയയെ ശ്യാംജിത്ത് എന്ന മുൻ കാമുകൻ കൊലപ്പെടുത്തിയതും. തിരുവനന്തപുരത്ത് ഷാരോൺ രാജ് എന്ന യുവാവിനെ ഗ്രീഷ്മ കൊലപ്പെടുത്തിയും ചൂണ്ടിക്കാട്ടിയാണ് ഹരീഷിന്റെ ഫേസ്ബുക്ക് കുറിപ്പിലൂടെയുള്ള പ്രതികരണം.
ഫേസ്ബുക്ക് പോസ്റ്റിലേക്ക്
പ്രണയിക്കാൻ അറിയാത്ത ഒരുത്തൻ കാമുകിയെ വെട്ടികൊല്ലുന്നു…പ്രണയിക്കാൻ അറിയാത്ത ഒരുത്തി കാമുകനെ വിഷം കൊടുത്ത് കൊല്ലുന്നു…പ്രണയം പാഠ്യ പദ്ധതിയിൽ പെടുത്തേണ്ട സമയം അതിക്രമിച്ചിരിക്കുന്നു.പ്രണയം രാഷ്‌ട്രീയമാണ്,അത് കുട്ടികൾ ശരിയായ രീതിയിൽ പഠിച്ചേ മതിയാവു.പ്രണയമില്ലാത്തവർക്ക് നല്ല അയൽപ്പക്കവും നല്ല സമൂഹവും നല്ല കുടുംബവും നല്ല രാഷ്‌ട്രവും നല്ല ലോകവും ഉണ്ടാക്കാൻ പറ്റില്ല.പ്രണയത്തെ പഠിക്കുമ്പോൾ മാത്രമേ നിങ്ങൾ ആധുനിക മനുഷ്യനാവുന്നുള്ളു.ശാസ്ത്രത്തെ മനസ്സിലാക്കാൻ പോലും പ്രണയം അത്യാവശ്യമാണ്.ദൈവവും ദൈവവമില്ലായ്മയും പ്രണയമാണ്,പ്രണയമില്ലാതെ മനുഷ്യൻ എന്ന ജന്തുവിന് ജീവിക്കാൻ പറ്റില്ല.പക്ഷെ പ്രണയം സ്വകാര്യസ്വത്തവകാശമല്ലെന്നും അത് മനുഷ്യനെ മനുഷ്യനാക്കുന്ന സ്വാതന്ത്ര്യമാണെന്നും അവൻ,അവൾ പഠിച്ചേ പറ്റു…പ്രണയം പഠിക്കാത്തവന് പ്രണയിക്കാൻ അവകാശമില്ലാ എന്നും അവൻ,അവൾ പഠിച്ചേ മതിയാകൂ.
