പത്തനംതിട്ട: ഇത്തവണത്തെ ശബരിമല മണ്ഡലകാല തീർത്ഥാടനത്തിന് കർണാടകയിൽ നിന്നും കേരളത്തിലേക്ക് ആദ്യമായി സ്‌പെഷ്യൽ ട്രെയിൻ അനുവദിച്ചു. റെയിൽവേ പാസഞ്ചേഴ്‌സ് അമിനിറ്റി കമ്മിറ്റി ചെയർമാൻ പി.കെ. കൃഷ്ണദാസാണ് ഇക്കാര്യം അറിയിച്ചത്. കർണാടകയിലെ വിജയപുരം സ്റ്റേഷനിൽ നിന്നും കോട്ടയം വരെയുള്ള സർവീസ് നവംബർ ഏഴ് മുതൽ ആരംഭിക്കും. ഫെബ്രുവരി ഒന്ന് വരെയാണ് സർവീസ് തുടരുക.
ട്രെയിൻ ചെങ്ങന്നൂർ വരെ നീട്ടിയേക്കുമെന്നാണ് സൂചന. ഇതിന് പുറമേ തമിഴ്‌നാട്, ആന്ധ്രാപ്രദേശ്, തെലങ്കാന എന്നിവിടങ്ങളിൽ നിന്നും മുൻവർഷങ്ങൾക്ക് സമാനമായി സ്‌പെഷ്യൽ സർവീസുകളുണ്ടാകും. തീർത്ഥാടനത്തോടനുബന്ധിച്ച് എല്ലാ ദിവസവും രണ്ടു സ്‌പെഷ്യൽ ട്രെയിനുകൾ വീതമാണ് സർവീസ് നടത്തുന്നത്. അതേസമയം ചെങ്ങന്നൂർ-പമ്പ എലിവേറ്റഡ് റെയിൽപാത സംബന്ധിച്ച് നിരവധി പദ്ധതികൾ പലരും സമർപ്പിച്ചിട്ടുണ്ടെങ്കിലും റെയിൽവേ ബോർഡ് തലത്തിൽ തീരുമാനങ്ങളൊന്നുമെടുത്തിട്ടില്ലെന്നും കൃഷ്ണദാസ് പറഞ്ഞു.
Comments