തലമുടിയിലെയും തലയോട്ടിയിലെയും അഴുക്കുകൾ നീക്കം ചെയ്യാനാണ് നാം ഷാംപൂ ഉപയോഗിക്കുന്നത്. എന്നാൽ ഷാംപൂവിലടങ്ങിയിരിക്കുന്ന പല ഘടകങ്ങളും മുടിയെ വളരെധികം പരുപരുത്തതാക്കുന്നു. ഇതിന് പരിഹാരമായാണ് ഷാംപൂ ചെയ്തതിന് പിന്നാലെ കണ്ടീഷ്ണർ ഉപയോഗിക്കണമെന്ന് പറയുന്നത്.
കണ്ടീഷ്ണറുകളിൽ ഫാറ്റി ആൽക്കഹോൾസ് അടങ്ങിയിട്ടുണ്ട്. കൂടാതെ മുടിയെ മിനുസമുള്ളതാക്കാനും ഫ്ളക്സിബിൾ ആക്കാനുമുള്ള ഘടകങ്ങൾ ഉൾപ്പെടുത്തിയാണ് കണ്ടീഷ്ണർ തയ്യാറാക്കുന്നത്. ചില കണ്ടീഷ്ണറിൽ പ്രോട്ടീനുകളും അടങ്ങിയിരിക്കും. ഇത് മുടിയുടെ അറ്റം രണ്ടാകുന്ന പ്രവണത ഇല്ലാതാക്കാൻ സഹായിക്കും. മറ്റ് ചില കണ്ടീഷ്ണറുകളിൽ മുടി കനം തോന്നിക്കാനുള്ള ഘടകങ്ങളും അടങ്ങിയിരിക്കും. അതിനാൽ കണ്ടീഷ്ണർ ഉപയോഗിക്കുന്നത് മൂലം നിരവധി ഗുണങ്ങളാണ് മുടിക്ക് ലഭിക്കുക.
ഉപയോഗിക്കേണ്ടത് ഇങ്ങനെ:
മുടി ആദ്യം ഷാംപൂ ചെയ്യുക. തലയിൽ പുരട്ടിയ ഷാംപൂ മുഴുവനായും കഴുകി കളയുക. ശേഷം കണ്ടീഷ്ണർ കയ്യിലെടുത്ത് മുടിയിൽ പുരട്ടുക. മുടിയുടെ അഗ്രം വരെ പുരട്ടാവുന്നതാണ്. എന്നാൽ തലയോട്ടിയിൽ കണ്ടീഷ്ണർ ആകാതിരിക്കാൻ പ്രത്യേകം ശ്രദ്ധിക്കണം. ഏകദേശം ഒരു മിനുട്ടെങ്കിലും മുടിയിൽ കണ്ടീഷ്ണർ പുരട്ടി വെക്കുക. അതിന് ശേഷം കഴുകി കളയാം.
ഇനി നിങ്ങളുടെ കയ്യിലുള്ളത് leave-in hair conditioner ആണെങ്കിൽ അവ ഉപയോഗിക്കേണ്ടത് കുളി കഴിഞ്ഞതിന് ശേഷമാണ്. ഷാംപൂ ഉപയോഗിച്ച് മുടി കഴുകിയതിന് ശേഷം നല്ലപോലെ മുടി തോർത്തിയെടുക്കുക. ശേഷം കണ്ടീഷ്ണർ എടുത്ത് പുരട്ടുക. ഒരു ചീർപ്പ് ഉപയോഗിച്ച് മുടിയീരുക. ഡ്രൈയർ ഉപയോഗിക്കാതെ നാച്ചുറലായി മുടി ഉണങ്ങാൻ അനുവദിക്കുക.
നിങ്ങളുടെ മുടി ഡ്രൈ ഹെയർ ആണെങ്കിൽ നിർബന്ധമായും കണ്ടീഷ്ണർ ഉപയോഗിക്കേണ്ടതാണ്. മുടിയെ മിനുസമുള്ളതാക്കാൻ കണ്ടീഷ്ണർ സഹായിക്കും. കണ്ടീഷ്ണർ ഉപയോഗിച്ച മുടി ഒതുങ്ങി നിൽക്കുകയും ചെയ്യും. അതേസമയം ചിലർക്ക് മുഖക്കുരു വർധിക്കാൻ കണ്ടീഷ്ണർ കാരണമാകാറുണ്ട്. അതിനാൽ കണ്ടീഷ്ണർ ഉപയോഗിക്കുമ്പോൾ മുഖത്തേക്ക് പരക്കാതിരിക്കാൻ ശ്രദ്ധിക്കേണ്ടതാണ്. ചിലർ ഷാംപൂ ചെയ്യാതെ തന്നെ കണ്ടീഷ്ണർ തലയിൽ പുരട്ടും. അതുകൊണ്ട് പ്രത്യേകിച്ച് ഗുണം ലഭിക്കുകയില്ല. എപ്പോഴും ആദ്യം ഷാംപൂ ചെയ്ത് മുടി വൃത്തിയാക്കിയതിന് ശേഷം കണ്ടീഷ്ണർ പുരട്ടുക.
