മെസ്സി പുഴയിലെങ്കിൽ നെയ്മർ കരയിൽ; പുല്ലാവൂരിൽ കട്ടൗട്ടുകളിലൂടെ പോരടിച്ച് ആരാധകർ

കോഴിക്കോട് : പുല്ലാവൂരിൽ പുഴയിൽ ഉയർത്തിയ അർജന്റീന താരം ലയണൽ മെസിയുടെ കട്ടൗട്ടിന് മറുപടിയുമായി ബ്രസീൽ ആരാധകർ. നെയ്മറിന്റെ ഒരു പടുകൂറ്റൻ കട്ടൗട്ട് നദിക്കരയിൽ ഉയർത്തിയാണ് ഇവർ മറുപടി നൽകിയിരിക്കുന്നത്.

പുഴയ്‌ക്ക് നടുവിൽ വെച്ചിരിക്കുന്ന മെസ്സിയുടെ കട്ടൗട്ടിന്റെ ചിത്രങ്ങൾ രാജ്യാന്തര തലത്തിൽ ശ്രദ്ധ നേടിയിരുന്നു. അർജന്റീനയിലെ മാദ്ധ്യമങ്ങൾ പോലും കൊച്ചു കേരളത്തിലെ ഈ വാർത്ത റിപ്പോർട്ട് ചെയ്തു. പിന്നാലെയാണ് തങ്ങളും പിന്നോട്ടില്ലെന്ന് പറഞ്ഞുകൊണ്ട് നെയ്മർ ആരാധകർ കരയിൽ കട്ടൗട്ട് വെച്ചത്.

World cup war at Kerala, Pullavur@FIFAWorldCup @FIFAcom @Goal_India @CBF_Futebol @Sports18 @433 @TyCSports pic.twitter.com/CpOzdhfD96

— Achilleus 🕸 (@aeiouyi) November 3, 2022

കോഴിക്കോട് നഗരത്തിൽ നിന്ന് 21 കിലോമീറ്റർ അകലെ കരുവട്ടൂർ പഞ്ചായത്തിലെ പുല്ലാവൂർ ഗ്രാമത്തിൽ കുറുങ്ങാട്ടു കടവ് പുഴയുടെ നടുവിലാണ് ആ കട്ടൗട്ട് പോര്. 30 അടി നീളമുള്ള മെസ്സിയുടെ കട്ടൗട്ട് ആരാധകർ സ്ഥാപിച്ചപ്പോൾ, നെയ്മർ ആരാധകർ ഒരു പടി മുകളിലേക്ക് പൊങ്ങി. 40 അടി നീളമുള്ള നെയ്മറിന്റെ കട്ടൗട്ടാണ് ബ്രസീൽ ആരാധകർ സ്ഥാപിച്ചത്. ഇതിന്റെ വീഡിയോയും ആരാധകർ പുറത്തുവിട്ടിട്ടുണ്ട്.

ഖത്തറിൽ ലോകക്കപ്പ് ഫുട്‌ബോൾ ആരംഭിക്കാൻ ഇനി ദിവസങ്ങൾ മാത്രമാണ് ബാക്കി. 22ന് സൗദി അറേബ്യയ്‌ക്കെതിരെയാണ് ലോകകപ്പിൽ അർജന്റീനയുടെ ആദ്യ പോരാട്ടം. സൗദി, മെക്‌സിക്കോ, പോളണ്ട് ടീമുകൾക്കൊപ്പം ഗ്രൂപ്പ് സിയിലാണ് അർജന്റീന കളിക്കേണ്ടത്.