കേരളത്തെ നടുക്കിയ 2018-ലെ പ്രളയം സിനിമയാകുന്നു. ജൂഡ് ആന്റണി ജോസഫ് സംവിധാനം ചെയ്യുന്ന ചിത്രം 2018 എന്ന പേരിൽ തന്നെയാണ് വെള്ളിത്തിരയിലെത്തുന്നത്. എഴുത്തുകാരൻ അഖിൽ പി ധർമ്മജന്റെ അരങ്ങേറ്റ ചിത്രം കൂടിയാണിത്. ചിത്രത്തിന്റെ സഹരചയിതാവായി അഖിൽ എത്തുമ്പോൾ തിരക്കഥ തയ്യാറാക്കുന്നത് സംവിധായകനായ ജൂഡ് തന്നെയാണ്.
നടൻ ഫഹദ് ഫാസിലും പൃഥ്വിരാജ് സുകുമാരനും ചേർന്നാണ് ചിത്രത്തിന്റെ പോസ്റ്റർ പങ്കുവെച്ചത്. ‘എവരിവൺ ഈസ് എ ഹീറോ’ എന്ന ടാഗ് ലൈനോടെയാണ് പോസ്റ്റർ പുറത്തിറങ്ങിയിട്ടുള്ളത്.
പ്രളയത്തെ അതിജീവിച്ച സംസ്ഥാനത്തിന്റെ കഥ പറയുന്ന ചിത്രത്തിൽ യുവനടൻമാരുൾപ്പെടെ വമ്പൻ താരനിരയാണ് അണിനിരക്കുന്നത്. ടോവിനോ തോമസ്, കുഞ്ചാക്കോ ബോബൻ, ആസിഫ് അലി, വിനീത് ശ്രീനിവാസൻ, അപർണ ബാലമുരളി, കലയ് രസൻ, നരേൻ, ലാൽ, ഇന്ദ്രൻസ്, അജു വർഗീസ്, തൻവി റാം, ശിവദ, ഗൗതമി നായർ എന്നിവർ പ്രധാന കഥാപാത്രങ്ങളിൽ എത്തുന്നു.
ദുരന്തത്തെ വ്യക്തമാക്കുന്ന നിരവധി പ്രതീകങ്ങൾ കൂടി ഉൾപ്പെടുത്തി പ്രളയ ഓർമ്മകളിലേക്ക് വിരൽചൂണ്ടുന്ന പോസ്റ്റർ കൂടിയാണ് ഇപ്പോൾ പുറത്തുവന്നിരിക്കുന്നത്. തുറന്ന് വെച്ചിരിക്കുന്ന ഡാമും കനത്ത മഴയും മുങ്ങിത്താഴുന്ന വീട്ടുപകരണങ്ങളും രക്ഷയ്ക്കായി എത്തുന്ന മത്സ്യത്തൊഴിലാളികളുടെ ബോട്ടും സൈന്യത്തിന്റെ ഹെലികോപ്റ്ററും ടെറസിൽ നിന്നുകൊണ്ട് രക്ഷപ്പെടാൻ തുനിയുന്നവരും പോസ്റ്ററിൽ ഉൾപ്പെട്ടിട്ടുണ്ട്.
മാമാങ്കം, മാളികപ്പുറം എന്നീ ചിത്രങ്ങളുടെ നിർമ്മാതാവായ വേണു കുന്നപ്പിള്ളിയും സികെ പദ്മകുമാറും ആന്റോ ജോസഫും ചേർന്നാണ് 2018 നിർമ്മിക്കുന്നത്. മിന്നൽ മുരളിയുടെ പിന്നിൽ പ്രവർത്തിച്ച അതേ വിഎഫ്എക്സ് സംഘമാണ് 2018ലുമുള്ളതെന്ന് നിർമാതാവ് വേണു കുന്നപ്പിള്ളി അറിയിച്ചു. പികെ പ്രൈം പ്രൊഡക്ഷനുമായി ചേർന്ന് കാവ്യ ഫിലിംസിന്റെ ബാനറിൽ ചിത്രം പുറത്തിറങ്ങും.
Comments