റഷ്യൻ നിർമ്മിത പ്ലാറ്റ്ഫോമായ ടെലിഗ്രാമിന് അടുത്തിടെ വൻ ജനപ്രീതിയാണ് ലഭിക്കുന്നത്. വാട്സ് ആപ്പ് പോലുള്ള ആപ്ലിക്കേഷനുമായി താരതമ്യം ചെയ്യുമ്പോൾ ടെലിഗ്രാമിന് ഉപയോക്താക്കളെ ആകൃഷ്ടരാക്കുന്ന നിരവധി സവിശേഷതകളുണ്ട്. എന്നാൽ പലതും ആളുകൾക്ക് അറിയില്ല എന്ന് മാത്രം. ഇതിൽ ഏറ്റവും പ്രധാനം സന്ദേശങ്ങൾ ടെലിഗ്രാമിൽ ഷെഡ്യൂൾ ചെയ്യാൻ കഴിയുന്നു എന്നതാണ്.
പ്രധാനമായും ജോലിയുടെയോ ബിസിനസ്സിന്റെയോ ഒക്കെ ആവശ്യത്തിനായി ടെലിഗ്രാം ഉപയോഗിക്കുന്നവർക്കാണ് ഈ ഫീച്ചർ ഉപയോഗപ്പെടുന്നത്. മറ്റുള്ളവർക്കും ഇത് ഉപയോഗപ്പെടുത്താവുന്നതാണ്. എങ്ങനെയാണ് സന്ദേശങ്ങൾ ടെലിഗ്രാമിൽ ഷെഡ്യൂൾ ചെയ്യുന്നത്.
ടെലിഗ്രാം തുറന്ന ശേഷം നിങ്ങൾക്ക് സന്ദേശം അയക്കേണ്ട വ്യക്തിയെയോ ഗ്രൂപ്പിനെയോ തിരഞ്ഞെടുക്കുക.
നിങ്ങൾക്ക് അയക്കേണ്ട സന്ദേശം എന്താണോ അത് ടൈപ്പ് ചെയ്യുക.
ശേഷം വലതുവശത്തെ ഐക്കണിൽ ടാപ്പ് ചെയ്ത് പിടിക്കുക. അതിൽ രണ്ട് ഓപ്ഷനുകൾ നിങ്ങൾക്ക് കാണാൻ സാധിക്കു.
ഷെഡ്യൂൾ ഓപ്ഷൻ തിരഞ്ഞെടുക്കുക. അതിൽ നിങ്ങൾക്ക് സന്ദേശം അയക്കേണ്ട തിയതിയും സമയവും തിരഞ്ഞെടുക്കുക.
നീല ബട്ടണിൽ ടാപ്പുചെയ്യുക, ഷെഡ്യൂൾ ചെയ്ത സമയത്ത് സന്ദേശം ആർക്കാണോ അയക്കേണ്ടത് അത് അവിടെ എത്തുന്നതായിരിക്കും.
2013ന്റെ അവസാനത്തിലാണ് പാവൽ ദുറോവ്, നിക്കോളായ് ഡുറോവ് എന്ന റഷ്യൻ സഹോദരന്മാർ ടെലിഗ്രാം ആരംഭിച്ചത്.വീഡിയോ കോളിംഗ് , സന്ദേശങ്ങൾ കൈമാറൽ , ഫയൽ പങ്കിടൽ തുടങ്ങി നിരവധി സേവനങ്ങൾ ടെലിഗ്രാം വാഗ്ദാനം ചെയ്യുന്നുണ്ട്.
