കന്നഡയിൽ നിന്ന് എത്തിയ കാന്താര രാജ്യമൊട്ടാകെ ശ്രദ്ധയാകർഷിച്ചിരുന്നു. ഋഷബ് ഷെട്ടി സ്വന്തം സംവിധാനത്തിൽ നായകനായ കന്നഡ ചിത്രം സൃഷ്ടിച്ചത് വലിയ തരംഗമാണ്. കന്നഡയ്ക്ക് പുറമെ മലയാളം, ഹിന്ദി, തെലുങ്ക്, തമിഴ്, ഭാഷകളിലും മൊഴി മാറ്റി പ്രദർശനത്തിന് എത്തിയിട്ടുണ്ട്. സമൂഹമാദ്ധ്യമങ്ങളിൽ അടക്കം വലിയ ചർച്ചയ്ക്ക് ചിത്രം വഴിവച്ചിരുന്നു. എന്നാൽ ഇപ്പോൾ ചർച്ചയാകുന്നത് ‘കാന്താര’യുടെ രണ്ടാം ഭാഗത്തെ കുറിച്ചുള്ള സംവിധായകന്റെ വാക്കുകളാണ്. ഒരു അഭിമുഖത്തിലാണ് ചിത്രത്തിന്റെ രണ്ടാം ഭാഗം സംബന്ധിച്ച കാര്യങ്ങൾ അദ്ദേഹം വ്യക്തമാക്കിയത്.
രണ്ടാം ഭാഗം സംബന്ധിച്ച് ഇപ്പോൾ ഒന്നും പ്രതികരിക്കാൻ ആവില്ല. മനസ് ശൂന്യമാണ്. കാന്താരയ്ക്ക് ശേഷം സിനിമകൾ ചെയ്യാൻ ആഗ്രഹിച്ചിരുന്നു. എന്നാൽ ഇപ്പോൾ ആ സിനിമകൾ എല്ലാം മനസിൽ നിന്ന് ഇല്ലാതായി. ചിത്രം റിലീസ് ചെയ്തിട്ട് 35 ദിവസമേ ആയുള്ളൂ.അതിനാൽ രണ്ടാം ഭാഗത്തെ പറ്റി ഇപ്പോൾ സംസാരിക്കാൻ സാധിക്കില്ല. ഇപ്പോൾ കാന്താരയെ കുറിച്ച് മാത്രമേ സംസാരിക്കാനാകുള്ളൂ എന്നുമായിരുന്നു അദ്ദേഹത്തിന്റെ പ്രതികരണം.
നിരവധി പേരാണ് ചിത്രത്തിന് പ്രശംസയുമായി ഇതിനോടകം രംഗത്തെത്തിയിരിക്കുന്നത്. മാത്രമല്ല അഭിനന്ദനം അറിയിച്ച് സൂപ്പർ സ്റ്റാർ രജനീകാന്തും എത്തിയിരുന്നു. ട്വിറ്ററിലൂടെയായിരുന്നു അദ്ദേഹം അഭിനന്ദനവുമായി രംഗത്തെത്തിയത്. ‘അറിയുന്നതിനേക്കാൾ കൂടുതലാണ് അജ്ഞാതമായത്. കാന്താര സിനിമ എന്നിൽ രോമാഞ്ചം സൃഷ്ടിച്ചു. ഒരു എഴുത്തുകാരൻ, സംവിധായകൻ, നടൻ എന്നീ നിലകളിൽ ഋഷബ് തിളങ്ങി. താങ്കൾക്ക് അഭിവാദ്യങ്ങളെന്നായിരുന്നു രജനീകാന്തിന്റെ വാക്കുകൾ.
പത്തൊമ്പതാം നൂറ്റാണ്ടിന്റെ പശ്ചാത്തലത്തിൽ കഥ പറയുന്ന കാന്താര കർണാടകത്തിലെ ഒരു ഗ്രാമവും അവിടത്തെ ദൈവനർത്തക വിശ്വാസവുമാണ് ചർച്ച ചെയ്യുന്നത്. ചിത്രത്തിലെ ഋഷബ് ഷെട്ടിയുടെ പ്രകടനവും എടുത്തുപറയേണ്ടതാണ്.കെ.ജി.എഫ് ചാപ്റ്റർ ഒന്നിനെ മറികടന്ന് കർണാടക ബോക്സോഫീസിലെ എക്കാലത്തേയും വലിയ രണ്ടാമത്തെ ബ്ലോക്ബസ്റ്റർ ചിത്രമായിരിക്കുകയാണ് കാന്താര. നിലവിൽ കെ.ജി.എഫ് ചാപ്റ്റർ രണ്ട് മാത്രമാണ് ഋഷബ് ഷെട്ടി ചിത്രത്തിന് മുന്നിലുള്ളത്.
