കോഴിക്കോട് : കോഴിക്കോട് ഹിജാബ് കത്തിച്ച് പ്രതിഷേധവുമായി യുവതികൾ. ഇറാനിൽ നടക്കുന്ന ഹിജാബ് വിരുദ്ധ പ്രക്ഷോഭത്തിന് ഐക്യദാർഢ്യം പ്രഖ്യാപിച്ചാണ് പ്രതിഷേധം സംഘടിപ്പിച്ചത്. കോഴിക്കോട് ടൗൺഹാളിൽ ഇസ്ലാമിക യുവതികളുടെ സംഘടന നടത്തിയ സെമിനാറിന് ഒടുവിലാണ് ഹിജാബ് കത്തിച്ചത്. ഇറാനിലെ ഹിജാബ് വിരുദ്ധ പ്രക്ഷോഭത്തിനെതിരെ ഇന്ത്യയിൽ ആദ്യമായാണ് പ്രതിഷേധം നടക്കുന്നത്.
ഇന്ന് വൈകീട്ടോടെയാണ് സംഭവം. കോഴിക്കോട് നഗരത്തിലെ പ്രൊവിഡൻസ് വനിതാ കോളെജിൽ ഹിജാബ് അനുവദിക്കാത്തതിന് സമരം നടത്തുന്നതിനിടെയാണ് ഹിജാബ് കത്തിച്ച് പ്രതിഷേധവുമായി യുവതികൾ വെല്ലുവിളികളുമായി രംഗത്തെത്തുന്നത് എന്നതും ശ്രദ്ധേയമാണ്.
ഇറാനിൽ മാസങ്ങളായി ഹിജാബ് നിയമങ്ങൾക്കെതിരെ പ്രതിഷേധം ആളിക്കത്തുകയാണ്. ഹിജാബ് നിയമങ്ങൾ ലംഘിച്ചതിന് മഹ്സ അമിനി എന്ന 22 കാരിയെ സദാചാര പോലീസ് ആക്രമിച്ച് കൊലപ്പെടുത്തിയിരുന്നു. ഇതിനെതിരെ അമ്മമാരും യുവതികളും ഉൾപ്പെടെയുള്ള സ്ത്രീസമൂഹമാണ് തെരുവിലിറങ്ങിയിരിക്കുന്നത്. മുടി മുറിച്ചും ഹിജാബ് കത്തിച്ചുമാണ് ഇവർ പ്രതിഷേധിച്ചത്. ശരിഅത്ത് നിയമങ്ങളല്ല, സ്വാതന്ത്ര്യമാണ് തങ്ങൾക്ക് ആവശ്യമെന്നാണ് ഇവരുടെ നിലപാട്.
