ന്യൂഡൽഹി: സവിതാ പൂനിയയുടെ നേതൃത്വത്തിൽ ഹോക്കി ഇന്ത്യയുടെ വനിതാ നിര ആന്താരാഷ്ട്ര വിമൺസ് നേഷൻസ് കപ്പിനിറങ്ങുന്നു. ദീപ് ഗ്രേസ് ഇക്കയാണ് വൈസ് ക്യാപ്റ്റൻ. ഇരുപതംഗ ടീമിനെയാണ് ഹോക്കി ഫെഡറേഷൻ പ്രഖ്യാപിച്ചത്. ആദ്യമായിട്ടാണ് നേഷൻസ് കപ്പ് ടൂർണ്ണമെന്റ് സംഘടിപ്പിക്കുന്നത്.
ഹോക്കി ലീഗിന് വലിയ പിന്തുണ ലഭിക്കുന്നതിനാലാണ് ഫുട്ബോളിലെ പോലെ നേഷൻസ് ലീഗ് പരീക്ഷിക്കാൻ ഒരുങ്ങുന്നത്. അന്താരാഷ്ട്ര ഹോക്കി കലണ്ടറിൽ സുപ്രധാന മത്സര സീസണായി ഈ വർഷം മുതൽ നേഷൻസ് ലീഗ് കപ്പ് മാറുമെന്നാണ് പ്രതീക്ഷ. 2023-24 എഫ്ഐഎച്ച് വിമൺസ് ഹോക്കി പ്രോ ലീഗിന്റെ പ്രചാരണത്തിനും നേഷൻസ് കപ്പ് ഉപകാരപ്പെടും.
ടീമിൽ പുതുമുഖമായ ഫോർവേഡ് താരം ദുംഗ്ദുംഗിന് കന്നി അവസരം നൽകിയിരിക്കുകയാണ്. മധ്യനിരയിൽ ഏറെ പരിചയ സമ്പന്നയായ നവ്ജ്യോത് കൗർ ടീമിൽ മടങ്ങിയെത്തി. കോമൺവൽത്ത് ഗെയിംസിൽ കൊറോണ മൂലം കൗറിന് മത്സരിക്കാൻ സാധിച്ചിരുന്നില്ല. സവിതയ്ക്കൊപ്പം ബിച്ചു ദേവി ഖരിബാം ഗോൾ വല കാക്കും. ഗുർജീത് കൗർ, നിക്കി പ്രധാൻ, ഉദിത, ഇഷിക എന്നിവരാണ് പ്രതിരോധ നിരയിലുള്ളത്.
മധ്യനിരയിൽ നിഷ. സാലിമ ടെറ്റെ, സുശീല ചാനു ഖാരിബാം, മോനിക്ക, നേഹ, സോനിക, ജ്യോതി എന്നിവരും ടീമിന് കരുത്താകും. ഫോർവേഡ് താരങ്ങളായി വന്ദന കഠാരിയ, ലാറേംസിയാമി, നവ്നീത് കൗർ, സംഗീത കുമാരി എന്നിവരുമുണ്ട്.
ഇന്ത്യ ഗ്രൂപ്പ് ബിയിൽ കാനഡ, ജപ്പാൻ, ദക്ഷിണ കൊറിയ എന്നിവർക്കൊപ്പമാണ് കളിക്കാനിറങ്ങുന്നത്. ഗ്രൂപ്പ് എയിൽ അയർലാന്റ്, ഇറ്റലി, കൊറിയ, സ്പെയിൻ എന്നീ ടീമുകളാണ് ഇറങ്ങുന്നത്.
