മലയാള ചലച്ചിത്ര സംവിധായകൻ, തിരക്കഥാകൃത്ത്, നടൻ എന്നീ നിലകളിൽ ജനങ്ങൾക്ക് പ്രിയങ്കരനാണ് ബേസിൽ ജോസഫ്. ഇപ്പോഴിതാ ബേസിലിന്റെ പുതിയ സിനിമയുടെ പ്രഖ്യാപനം വന്നിരിക്കുകയാണ്. സാധാരണ ഗതിയിൽ തന്റെ സിനിമകളിൽ വരുത്താറുള്ള വ്യത്യസ്തത പുതിയ സിനിമയുടെ പ്രഖ്യാപനത്തിലും ബേസിൽ കൊണ്ടു വന്നിട്ടുണ്ട്.
വിവാഹ പത്രപരസ്യം പങ്കുവെച്ച് കൊണ്ടാണ് പുതിയ സിനിമയെ കുറിച്ച് താരം വെളിപ്പെടുത്തിയിരിക്കുന്നത്. പരസ്യത്തിൽ ഉള്ളത് നിരഞ്ജന അനൂപും അഭിറാം രാധാകൃഷ്ണനുമാണ് . ചന്ദ്രിക രവീന്ദ്രൻ, ബിബീഷ് ബാലൻ എന്നീ കഥാപാത്രങ്ങളായാണ് ഇരുവരും ചിത്രത്തിൽ എത്തുന്നതെന്ന് പോസ്റ്ററിൽ നിന്നും വ്യക്തമാണ്. ചിത്രത്തെ കുറിച്ചുളള മറ്റുള്ള വിവരങ്ങൾ പുറത്ത് വന്നിട്ടില്ല.
‘ചില പ്രത്യേക സാഹചര്യങ്ങളാൽ എന്റെ രണ്ടാമത്തെ മകളുടെ വിവാഹ നിശ്ചയം ഒന്നാമതായി നടത്താൻ തീരുമാനിച്ച വിവരം സന്തോഷ പൂർവം അറിയിച്ചുകൊള്ളട്ടെ. തീരുമാനം പെട്ടെന്നായതിനാൽ നേരിട്ട് വന്നു ക്ഷണിക്കാൻ സാധിക്കാത്തതിൽ ഖേദിക്കുന്നു. ഇതൊരു ക്ഷണമായി സ്വീകരിച്ചു ചടങ്ങിലേക്ക് എല്ലാവരും എത്തിച്ചേരണമെന്ന് അഭ്യർത്ഥിക്കുന്നു’ എന്നാണ് പരസ്യത്തിലെ വാചകം. സിനിമയുടെ പോസ്റ്റർ ഇതിനോടകം വൈറലായി മാറിയിരിക്കുകയാണ്. ചിത്രത്തെ കുറിച്ചുള്ള പുതിയ വിവരങ്ങൾ അണിയറപ്രവർത്തകർ നവംബർ 14 ന് പുറത്തുവിടുമെന്നാണ് സൂചന.
Comments