എറണാകുളം: നീണ്ട ഇടവേളയ്‌ക്ക് ശേഷം പ്രിയ താരം കാവ്യ മാധവൻ വീണ്ടും ക്യാമറയ്ക്ക് മുൻപിൽ. നൃത്തകലയിലെ ഗുരു ആനന്ദൻ മാസ്റ്ററുടെ പുതിയ സംരംഭത്തിന് ആശംസകൾ നേരുന്നതിന് വേണ്ടിയാണ് കാവ്യാ മാധവൻ വീണ്ടും ക്യാമറയ്ക്ക് മുൻപിൽ പ്രത്യക്ഷപ്പെട്ടത്. ആനന്ദൻ മാസ്റ്റർ തന്റെ മാതാവിന്റെയും, പിതാവിന്റെയും, സഹോദരന്റെയും സ്ഥാനത്ത് നിൽക്കുന്നയാളാണെന്ന് താരം പറഞ്ഞു.
ക്ലാസിക്കൽ നൃത്ത ഡാൻസ് ബാൻഡ് ആയ ആനന്ദ വൈഭവം എന്നാണ് ആനന്ദൻ മാസ്റ്ററുടെ പുതിയ സംരംഭം. ലോകത്തിലെ ആദ്യത്തെ ക്ലാസിക്കൽ ബാൻഡ് ആണ് ഇത്. പുതിയൊരു സംരംഭം തുടങ്ങിയതിൽ അതിയായ സന്തോഷമുണ്ട്. ഏകദേശം 20 വർഷത്തോളം അദ്ദേഹത്തിന്റെ വിദ്യാർത്ഥിയായി താൻ ഇരുന്നിട്ടുണ്ട്. അദ്ദേഹവുമായുള്ള തന്റെ ബന്ധം നിർവ്വചിക്കാൻ കഴിയാത്തതാണെന്നും കാവ്യ മാധവൻ പറഞ്ഞു.
നൃത്തം പഠിക്കണമെന്ന ആഗ്രഹം ഉടലെടുത്തതോടെയാണ് താൻ ആനന്ദൻ മാഷിലേക്ക് എത്തുന്നത്. വിദ്യാർത്ഥികളെ മനസ്സിലാക്കിയായിരുന്നു അദ്ദേഹം ചുവടുകൾ പഠിപ്പിച്ചിരുന്നത്. ഒരിക്കലും വഴക്ക് പറഞ്ഞിട്ടില്ല. തന്നെ കേരളത്തിലെ ഒരുപാട് വേദികളിൽ നൃത്തം ചെയ്യാൻ പ്രാപ്തയാക്കിയത് ആനന്ദൻ മാഷാണെന്നും താരം കൂട്ടിച്ചേർത്തു.
തന്റെ പിതാവിന്റെയും മാതാവിന്റെയും സഹോദരന്റെയും സ്ഥാനത്ത് നിൽക്കുന്ന ആളാണ് ആനന്ദൻ മാഷ്. നമ്മൾ തളർന്നിരിക്കുമ്പോൾ പിടിച്ചെഴുന്നേൽപ്പിക്കുന്ന ആളാണ് അദ്ദേഹം. മാഷിന്റെ കുടുംബം തന്റെ കുടുംബം പോലെയാണ്. പുതിയ സംരംഭത്തിന് ആശംസകൾ. മനസ്സുകൊണ്ട് ഒപ്പമുണ്ടെന്നും താരം പറഞ്ഞു. താരം വീണ്ടും ക്യാമറയ്ക്ക് മുൻപിലെത്തിയതറിഞ്ഞ് ആകാംക്ഷയോടെയും പ്രാർത്ഥനയോടെയും കാത്തിരിക്കുകയാണ് ആരാധകർ. വിവാദങ്ങളിൽ പെടുന്നതിന് മുമ്പ് ധാരാളം ആരാധകരുളള നടിയായിരുന്നു കാവ്യ.
