ഉണ്ണി മുകുന്ദൻ നായകനാകുന്ന ‘ഷെഫീക്കിന്റെ സന്തോഷം’ എന്ന ചിത്രത്തിന്റെ ട്രെയിലർ പുറത്തുവിട്ടു. നവാഗതനായ അനൂപ് പന്തളമാണ് ചിത്രം സംവിധാനം ചെയ്യുന്നത്. ചിരിപ്പിച്ചും കണ്ണീരണിയിച്ചും പ്രേക്ഷകർക്ക് സംതൃപ്തി നൽകുന്ന ഒരു കൊച്ചു ചിത്രമായിരിക്കും ഷഫീക്കിന്റെ സന്തോഷം. സിനിമയിലെ പ്രകടനത്തിന് ഉണ്ണി മുകുന്ദനൊപ്പം നടൻ ബാലയും കയ്യടി നേടുമെന്ന് ഉറപ്പു നൽകുന്ന ട്രെയിലറാണ് പുറത്തു വന്നിരിക്കുന്നത്. തന്റെ സ്വാഭാവിക ശബ്ദത്തിലും ശൈലിയിലുമാണ് ചിത്രത്തിൽ ബാല സംസാരിക്കുന്നത്. ‘ദി ഈസ് റാങ്ങ്’ എന്ന തന്റെ തന്നെ വൈറലായ ഡയലോഗും ട്രെയിലറിൽ താരം പറയുന്നു.
സിനിമയുടെ ടീസറും ഉണ്ണിമുകുന്ദൻ ആലപിച്ച ഒരു ഗാനവും അണിയറ പ്രവർത്തകർ പുറത്തു വിട്ടിരുന്നു. ‘പൊൻപുലരികൾ പോരുന്നേ’ എന്ന മനോഹര ഗാനമാണ് പുറത്തു വന്നത്. മനു മൻജിത്ത് എഴുതിയ വരികൾക്ക് ഈണം പകർന്നിരിക്കുന്നത് ഷാൻ റഹ്മാനാണ്. അനൂപ് പന്തളം തന്നെയാണ് ചിത്രത്തിന്റെ തിരക്കഥ രചിച്ചിരിക്കുന്നതും. നവംബർ 25-ന് സിനിമ തിയറ്ററുകളിൽ റിലീസ് ചെയ്യും.
മനോജ് കെ ജയൻ, ദിവ്യാ പിള്ള, ആത്മീയാ രാജൻ, ഷഹീൻ സിദ്ദിഖ്, മിഥുൻ രമേശ്, സ്മിനു സിജോ എന്നിവരും മറ്റ് മുഖ്യവേഷങ്ങളിലുണ്ട്. എൽദോ ഐസക് ഛായാഗ്രഹണവും നൗഫൽ അബ്ദുള്ള എഡിറ്റിംഗും നിർവ്വഹിക്കുന്നു. പ്രൊഡക്ഷൻ കണ്ട്രോളര്-വിനോദ് മംഗലത്ത്, മേക്കപ്പ്- അരുണ് ആയൂര്, വസ്ത്രാലങ്കാരം- അരുണ് മനോഹര്, സ്റ്റില്സ്- അജി മസ്ക്കറ്റ്, അസോസിയേറ്റ് ഡയറക്ടര്- രാജേഷ് കെ രാജൻ എന്നിവരാണ് മറ്റ് അണിയറ പ്രവർത്തകർ.
Comments