ജിമെയിൽ വഴിയുള്ള തട്ടിപ്പ് വ്യാപകമാകുന്നുവെന്ന മുന്നറിയിപ്പുമായി ഗൂഗിൾ. സ്പാം മെയിൽ കൂടാതെ ഇൻബോക്സിൽ വന്ന് കിടക്കുന്ന മെയിൽ ഓപ്പൺ ചെയ്യുന്നവർക്കാണ് മുന്നറിയിപ്പ് നൽകിയിരിക്കുന്നത്. തട്ടിപ്പ് രീതികളെ കുറിച്ചും അതിനെതിരെ സ്വീകരിക്കേണ്ട മുൻകരുതലുകളെ കുറിച്ചുമെല്ലാം ഗൂഗിൾ വിശദമാക്കുന്നുണ്ട്. ഗിഫ്റ്റ് കാർഡുകളുടെ പേരിലായിരിക്കും മെയിലുകൾ വരുന്നത്.
ഇത്തരം മെയിലുകൾ പ്രത്യേകം ശ്രദ്ധിക്കണം. മറ്റ് ചില മെയിലുകളിൽ ക്രെഡിറ്റ് കാർഡ് വിവരങ്ങൾ ചോദിച്ച് സമ്മാനങ്ങൾ വാഗ്ദാനം ചെയ്യുന്നു. ഇതെല്ലാം തട്ടിപ്പ് മെയിലുകളാണ്. ജീവകാരുണ്യപ്രവർത്തനങ്ങളുടെ പേരിലും തട്ടിപ്പുകൾ നടക്കുന്നു. നേരിട്ട് പണമയക്കാനുള്ള സംവിധാനം ഉണ്ടെന്നാണ് ഇത്തരം മെയിലുകളിൽ പറയുന്നത്.
സബ്സ്ക്രിപ്ഷൻ പുതുക്കണം എന്ന് ആവശ്യപ്പെടുന്ന മെയിലുകൾ വഴിയും തട്ടിപ്പ് നടക്കുന്നു. പണം ആവശ്യപ്പെട്ടുള്ള മെയിലുകളെല്ലാം അതീവ ശ്രദ്ധയോടെ വേണം കൈകാര്യം ചെയ്യാൻ. മുൻനിര സ്ഥാപനങ്ങൾ ഒന്നും തന്നെ പണം ചോദിക്കാറില്ല എന്നും ഗൂഗിൾ ചൂണ്ടിക്കാണിക്കുന്നു.
