തിരുവനന്തപുരം: മഴയ്ക്ക് നേരിയ ശമനമായതോടെ സംസ്ഥാനത്ത് ചൂട് കൂടുന്നു. അടുത്ത മൂന്ന് ദിവസങ്ങളില് ഒറ്റപ്പെട്ടയിടങ്ങളില് സാധാരണയേക്കാള് 3 മുതല് 4 ഡിഗ്രി സെല്ഷ്യസ് വരെ താപനില ഉയരാന് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്കി. ഇതിന് പിന്നാലെ സംസ്ഥാനത്ത് അള്ട്രാവയലറ്റ് രശ്മികളുടെ തോതിലും വര്ധന രേഖപ്പെടുത്തി. ശനിയാഴ്ച സംസ്ഥാനത്ത് ഏറ്റവും ഉയര്ന്ന താപനില രേഖപ്പെടുത്തിയത് പുനലൂരിലാണ്. 36.2 ഡിഗ്രി സെല്ഷ്യസാണ് ഇവിടെ രേഖപ്പെടുത്തിയത്. സാധാരണയെക്കാള് 4.7 ഡിഗ്രി കൂടുതലാണിത്. മറ്റ് പല പ്രദേശങ്ങളിലും സാധാരണയെക്കാള് രണ്ട് ഡിഗ്രി വരെ അധിക താപനിലയാണ് അനുഭവപ്പെടുന്നത്.
സംസ്ഥാനത്തെ വിവിധ പ്രദേശങ്ങളില് യുവി ഇന്ഡക്സ് 7 മുതല് 8 വരെ ഉയര്ന്നിട്ടുണ്ട്. ശക്തമായ സൂര്യപ്രകാശം ലഭിക്കുന്ന സമയങ്ങളില് നേരിട്ട് വെയില് ഏല്ക്കുന്നത് ആരോഗ്യത്തിന് ബുദ്ധിമുട്ടുകള് ഉണ്ടാക്കാന് സാധ്യതയുള്ളതിനാല് ജാഗ്രത പാലിക്കണമെന്നാണ് മുന്നറിയിപ്പ്. മഴമേഘങ്ങളുടെ സാന്നിധ്യം കുറഞ്ഞതും അന്തരീക്ഷത്തിലെ മാറ്റങ്ങളും കേരളത്തിലെ ചൂട് വര്ധിക്കാന് കാരണമാകുന്നുണ്ട്. സൂര്യരശ്മികള് കേരളത്തില് കൂടുതല് ലംബമായി പതിക്കുന്ന കാലഘട്ടമായതിനാല് വരും ദിവസങ്ങളിലും പകല്സമയത്ത് ചൂട് ശക്തമാകാന് സാധ്യതയുണ്ട്.
