തുണിളുടെ തിളക്കം മങ്ങിപ്പോകുന്നോ? വിഷമിക്കേണ്ട, ആസ്പിരിൻ ഗുളികയുണ്ടെങ്കിൽ ഈസിയായി വസ്ത്രത്തിന്റെ നിറം വീണ്ടെടുക്കാം

വസ്ത്രങ്ങൾ ഏറെ ഇഷ്ടപ്പെടുന്നവരാണ് നമ്മളിൽ പലരും. വിവിധ നിറങ്ങളിൽ വിവിധ രീതികളിലുള്ള വസ്ത്രങ്ങൾ മാറി മാറി ധരിക്കാൻ എല്ലാവർക്കും ഇഷ്ടമാണ്. തേച്ചുമിനുക്കിയ വസ്ത്രം മാത്രം ധരിച്ച് ശീലിച്ചവരുമുണ്ട്. പുതിയ ഒരു ഡ്രസ്സ് വാങ്ങിയാൽ അതിന്റെ നിറം മങ്ങാതെ മേന്മ നഷ്ടപ്പെടാതെ കൊണ്ടുനടക്കാൻ നാം പരമാവധി ശ്രമിക്കും. ഇഷ്ടപ്പെട്ട തുണിയാണെങ്കിൽ പിന്നെ പറയേണ്ട കാര്യമില്ല…

എന്നാൽ പലപ്പോഴും ഒന്നോ രണ്ടോ പ്രാവശ്യം അലക്കി കഴിഞ്ഞാൽ തുണിയുടെ നിറം മങ്ങിത്തുടങ്ങുക പതിവാണ്. ഉപയോഗിക്കുന്ന ഡിറ്റർജെന്റോ അല്ലെങ്കിൽ വെള്ളമോ ആയിരിക്കും ഇതിന്റെ പ്രധാന കാരണം. സൂര്യവെളിച്ചം നേരിട്ട് വസ്ത്രത്തിൽ തട്ടുന്നതും അതിന്റെ തിളക്കത്തെ ബാധിക്കും. നിറം മങ്ങിപ്പോകുന്നത് കാരണം പലപ്പോഴും നമുക്ക് പല വസ്ത്രങ്ങളും ഉപേക്ഷിക്കേണ്ടി വരാറുമുണ്ട്. എന്നാൽ ഇനി അങ്ങനെയൊരു ആശങ്ക വേണ്ടെന്നാണ് പുതിയ കണ്ടെത്തലുകൾ പറയുന്നത്. ആസ്പിരിൻ ഗുളികയുണ്ടെങ്കിൽ ഈസിയായി നിങ്ങൾ വസ്ത്രത്തിന്റെ തിളക്കം വീണ്ടെടുക്കാൻ സാധിക്കും.

325 മില്ലിഗ്രാം വീതമുള്ള അഞ്ച് ആസ്പിരിൻ ഗുളികകൾ മാത്രമേ ഇതിന് ആവശ്യമുളളൂ. ആദ്യം ഈ ഗുളികകൾ ചൂടുവെള്ളം നിറച്ച പാത്രത്തിലേക്കോ ടബ്ബിലേക്കോ ഇടണം. എല്ലാ ഗുളികകളും പൂർണ്ണമായും അലിഞ്ഞുപോകുന്നതുവരെ വെള്ളം ഇളക്കുക. ടാബ്ലെറ്റുകൾ വേഗത്തിൽ അലിഞ്ഞുപോകാൻ വേണ്ടി വെള്ളത്തിൽ ഇടുന്നതിന് മുമ്പ് നിങ്ങൾക്ക് അവ പൊടിക്കുകയും ചെയ്യാം. തുടർന്ന് വസ്ത്രങ്ങൾ ആസ്പിരിൻ വെള്ളത്തിലിട്ട് എട്ട് മണിക്കൂർ നേരം കുതിർക്കാൻ വയ്‌ക്കുക. എട്ട് മണിക്കൂറിന് ശേഷം ഇവ വാഷിംഗ് മെഷീനിൽ ഇട്ട് കഴുകിയെടുക്കാം. തുണി കഴുകുമ്പോൾ വാഷിംഗ് മെഷീനിലേക്ക് കുറച്ച് ആസ്പിരിൻ ചേർത്തും കഴുകാം. എന്നാൽ ഗുളിക ചേർത്ത് കുതിർക്കാൻ വയ്‌ക്കുന്നതാണ് ഫലപ്രദമായ രീതി.

വസ്ത്രത്തിന്റെ നിറം വീണ്ടെടുക്കുക മാത്രമല്ല, തുണിയിൽ പിടിച്ചിരിക്കുന്ന അഴുക്ക് കളയാനും ഇത് സഹായിക്കും. കൈക്കുഴിയിലും മറ്റും കാണാറുള്ള നിറ വ്യത്യാസങ്ങളെയും ഈ വിദ്യയിലൂടെ ഇല്ലാതാക്കാം.