സിഡ്നി: ഓസ്ട്രേലിയയിലെ സിഡ്നിയിൽ ബൈറൺ ബേ ഗ്രാമത്തിൽ, കുളത്തിന് സമീപം കളിച്ചുകൊണ്ട് നിൽക്കുകയായിരുന്ന അഞ്ച് വയസ്സുകാരനെ പെരുമ്പാമ്പ് വരിഞ്ഞു മുറുക്കി. കുട്ടിയുമായി പാമ്പ് കുളത്തിലേക്ക് മറഞ്ഞു. കുട്ടിയുടെ കാലിലായിരുന്നു പാമ്പ് പിടുത്തമിട്ടത്.
സംഭവം കണ്ട കുട്ടിയുടെ മുത്തച്ഛൻ ഒന്നും നോക്കാതെ കുളത്തിലേക്ക് എടുത്ത് ചാടി. കുട്ടിയെ കഠിന പ്രയത്നത്തിലൂടെ വലിച്ച് കരയിലിട്ടു. അപ്പോഴും പാമ്പ് കുട്ടിയുടെ കാലിലെ പിടുത്തം വിട്ടിരുന്നില്ല.
ബഹളം കേട്ട് സ്ഥലത്തെത്തിയ കുട്ടിയുടെ അച്ഛൻ പാമ്പിനെ ബലം പ്രയോഗിച്ച് കുട്ടിയുടെ കാലിൽ നിന്നും വിടുവിച്ചു. ശേഷം കുട്ടിയെ ആശ്വസിപ്പിച്ച് പ്രഥമ ശുശ്രൂഷയും കുത്തിവെപ്പും നൽകി. പെരുമ്പാമ്പിന് വിഷമില്ലെന്ന് ഡോക്ടർ പറഞ്ഞതായും ഇതുകേട്ടതോടെ കുട്ടിയുടെ ആശങ്ക അകന്നതായും പിതാവ് പറഞ്ഞു. ഇതിനിടെ, പെരുമ്പാമ്പ് കാട്ടിലേക്ക് മറയുകയും ചെയ്തു. അച്ഛൻ മാത്രമല്ല, മുത്തച്ഛനും തന്റെ ഹീറോ ആണെന്നാണ് ഇപ്പോൾ അഞ്ച് വയസ്സുകാരൻ ബ്യൂ പറയുന്നത്.
