ന്യൂഡൽഹി: പഞ്ചാബ് ഗായകനായിരുന്ന സിദ്ധു മൂസെവാലയെ കൊലപ്പെടുത്തിയ സംഭവത്തിൽ മുഖ്യ പ്രതിയും ഗുണ്ടാ നേതാവുമായ ഗോൾഡി ബ്രാർ കാലിഫോർണിയയിൽ കസ്റ്റഡിയിലായെന്ന് റിപ്പോർട്ടുകൾ. രഹസ്യാന്വേഷണ ഏജൻസികളെ ഉദ്ധരിച്ചാണ് ദേശീയ മാദ്ധ്യമങ്ങൾ വാർത്ത പുറത്തുവിട്ടത്. എന്നാൽ ഇതേക്കുറിച്ച് ഔദ്യോഗികസ്ഥിരീകരണം പുറത്തുവന്നിട്ടില്ല.
യുഎസിലെ ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ (എഫ്ബിഐ) ആണ് മൂസെവാലയെ കസ്റ്റഡിയിലെടുത്തിരിക്കുന്നതെന്നാണ് ലഭ്യമാകുന്ന വിവരം. ഇയാളെ ഉടനെ ഉദ്യോഗസ്ഥർ ചോദ്യം ചെയ്യുമെന്നും റിപ്പോർട്ടുകളിൽ പറയുന്നു. എന്നാൽ കസ്റ്റഡിയെക്കുറിച്ച് കാലിഫോർണിയ പോലീസും പ്രതികരിച്ചിട്ടില്ല.
ലോറൻസ് ബിഷ്‌ണോയ് ഗുണ്ടാസംഘത്തിലെ നേതാവാണ് ഗോൾഡി ബ്രാർ. പഞ്ചാബിലെ ശ്രീമുക്താർ സാഹിബ് സ്വദേശിയായ ഇയാൾ 2017 ൽ സ്റ്റുഡന്റ് വീസയിൽ കാനഡയിലെത്തിയതോടെയാണ് ഗുണ്ടാസംഘത്തിൽ സജീവമായത്. സതീന്ദർജീത് സിംഗ് എന്നാണ് യഥാർത്ഥ പേര്.
മെയ് 29 നായിരുന്നു സിദ്ധുമൂസെവാല വെടിയേറ്റ് മരിച്ചത്. പിന്നീട് കൊലപാതകത്തിന്റെ ഉത്തരവാദിത്വം ഗോൾഡി ബ്രാർ ഏറ്റെടുക്കുകയായിരുന്നു. ബ്രാറിനെക്കുറിച്ച് സൂചനകൾ നൽകുന്നവർക്ക് രണ്ട് കോടി രൂപ നൽകുമെന്ന് സിദ്ധു മൂസെവാലയുടെ പിതാവ് കഴിഞ്ഞ ദിവസം വാഗ്ദാനം നൽകിയിരുന്നു.
Comments