ഇസ്ലാമാബാദ്: ഇന്ത്യയുടെ ബഹിഷ്കരണം ഭയന്ന് 2023 ഏഷ്യാ കപ്പിന് ആതിഥേയത്വം വഹിക്കാനുള്ള അവസരം പാകിസ്താന് നഷ്ടപ്പെടുത്തിയാൽ, തങ്ങൾ ഏഷ്യാ കപ്പിൽ നിന്നും പിന്മാറുമെന്ന് പാകിസ്താൻ ക്രിക്കറ്റ് ബോർഡ്.
ഒരു സാഹചര്യത്തിലും ഇന്ത്യൻ ടീം പാകിസ്താനിലേക്ക് പോകുന്ന പ്രശ്നമേ ഉദിക്കുന്നില്ലെന്ന് ബിസിസിഐ സെക്രട്ടറി ജയ് ഷാ നേരത്തേ വ്യക്തമാക്കിയിരുന്നു. ഏഷ്യാ കപ്പ് നിഷ്പക്ഷ വേദിയിൽ നടത്തുമെന്നും ജയ് ഷാ അറിയിച്ചിരുന്നു. ഇതിനെ തുടർന്നാണ് നിലപാട് വ്യക്തമാക്കി പിസിബി തലവൻ റമീസ് രാജ രംഗത്ത് വന്നിരിക്കുന്നത്.
ഇന്ത്യക്ക് വരാൻ താത്പര്യമില്ലെങ്കിൽ അവർ വരേണ്ട. പക്ഷേ ഏഷ്യാ കപ്പ് പാകിസ്താനിൽ നിന്നും മാറ്റാനാണ് നീക്കമെങ്കിൽ ഞങ്ങളാകും ടൂർണമെന്റ് ബഹിഷ്കരിക്കുക. റമീസ് രാജ പറഞ്ഞു. പാകിസ്താനിൽ നടക്കുന്ന ഏഷ്യാ കപ്പിൽ നിന്നും ഇന്ത്യ പിന്മാറിയാൽ 2023ലെ ഏകദിന ലോകകപ്പിൽ പങ്കെടുക്കാൻ പാകിസ്താൻ ടീം ഇന്ത്യയിലേക്ക് വരില്ലെന്നും റമീസ് രാജ നേരത്തേ വ്യക്തമാക്കിയിരുന്നു.
