തിരുവനന്തപുരം: കോർപ്പറേഷനിൽ നിന്നും വ്യാപകമായി ഫയലുകൾ കാണാതായതായി കണ്ടെത്തൽ. കഴിഞ്ഞ രണ്ട് വർഷത്തിനിടെ 17 ഫയലുകളാണ് കോർപ്പറേഷനിൽ നിന്നും കാണാതായിരിക്കുന്നത്. നിരവധി പ്രധാന ഫയലുകളും കാണാതായവയിൽ ഉൾപ്പെടുന്നു.
2021 ജനുവരി മുതൽ കഴിഞ്ഞ മാസം വരെയുള്ള ഫയലുകളുടെ കണക്ക് കഴിഞ്ഞ ദിവസം എടുത്തിരുന്നു. ഇതിലാണ് ചില ഫയലുകൾ കാണാതായതായി കണ്ടെത്തിയത്. കെട്ടിട നമ്പർ നൽകുന്നതുമായി ബന്ധപ്പെട്ട ഫയലുകളും, വീടു നിർമ്മാണ ധനസഹായം, ക്ഷേമ പെൻഷൻ, പൊതുജനസേവനം, തുടങ്ങിയവയുമായി ബന്ധപ്പെട്ട ഫയലുകൾ എന്നിവയെല്ലാമാണ് കാണാതായത്.
ഏഴ് സെക്ഷൻ ഓഫീസുകൾ, 25 സർക്കിൾ ഓഫീസുകൾ, 11 സോണൽ ഓഫീസുകൾ എന്നിവയാണ് കോർപ്പറേഷന്റെ മുഖ്യ ഓഫീസിന് കീഴിലായുള്ളത്. ഇവിടെയെല്ലാമാണ് കണക്കെടുപ്പ് നടത്തിയത്. അതേസമയം തിരുവനന്തപുരം മേയറായി ആര്യ രാജേന്ദ്രൻ ചുമതലയേറ്റ ശേഷമാണ് ഫയലുകൾ കാണാതായത് എന്നത് ശ്രദ്ധേയമാണ്. 2020 ഡിസംബർ 28 നായിരുന്നു മേയർ ആര്യാ രാജേന്ദ്രൻ ചുമതലയേറ്റത്. അധികാരത്തിലേറി ഒരു മാസം പൂർത്തിയാകുന്നതിന് മുൻപ് തന്നെ അഴിമതിയുടെ പേരിൽ ആര്യാ രാജേന്ദ്രൻ വിവാദത്തിൽപ്പെട്ടിരുന്നു. ഇതിന് ശേഷവും നിരവധി അഴിമതി ആരോപണങ്ങളാണ് മേയറുമായി ബന്ധപ്പെട്ട് ഉയർന്നിരുന്നത്. ഇതിനിടെയാണ് ഫയലുകൾ കാണാതായത്. സംഭവത്തിൽ ശക്തമായ പ്രതിഷേധവുമായി വരും ദിവസങ്ങളിൽ പ്രതിപക്ഷം രംഗത്ത് എത്തുമെന്നാണ് സൂചന.
