ഗുവാഹട്ടി : കോൺഗ്രസിലെ പല നേതാക്കളുമായി തനിക്ക് സുഹൃദ് ബന്ധമുണ്ടെന്ന് അസം മുഖ്യമന്ത്രി ഹിമന്ത ബിശ്വ ശർമ്മ. അവർ ഉപദേശത്തിനായി തന്നെ സമീപിക്കാറുണ്ടെന്നും അദ്ദേഹം പറഞ്ഞു. ദേശീയ മാദ്ധ്യമമായ ഇന്ത്യ ടുഡേയ്‌ക്ക് നൽകിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.
”ഞാൻ 22 വർഷം കോൺഗ്രസിൽ പ്രവർത്തിച്ചയാളാണ്. ഒരു രാത്രി കൊണ്ടൊന്നും അവരുമായുള്ള ബന്ധം അവസാനിക്കില്ല. ഇന്നും കോൺഗ്രസിലെ നേതാക്കളുമായി എനിക്ക് സുഹൃദ് ബന്ധമുണ്ട്. ഞാൻ രാഷ്‌ട്രീയത്തിലേക്ക് കൊണ്ടുവന്ന പലരും ഇന്നും എന്നോട് ഉപദേശങ്ങൾ ചോദിക്കാറുണ്ട്” എന്ന് അദ്ദേഹം പറഞ്ഞു.
അരുണാചൽ പ്രദേശിലെ തവാംഗ് സെക്ടറിൽ ഇന്ത്യയും ചൈനയും തമ്മിൽ നടന്ന ഏറ്റുമുട്ടലുമായി ബന്ധപ്പെട്ട് പാർലമെന്റിൽ പ്രശ്‌നം സൃഷ്ടിക്കാനാണ് പ്രതിപക്ഷം ആഗ്രഹിക്കുന്നത് എന്നും ശർമ്മ പറഞ്ഞു. ഇത്തരം കാര്യങ്ങൾ ഒരിക്കലും പരസ്യമായി ചർച്ച ചെയ്യരുത്. കാരണം ചൈനീസ് ചാരന്മാർ ഇതെല്ലാം ശ്രദ്ധിക്കുകയും പുതിയ തന്ത്രങ്ങൾ മെനയുകയും ചെയ്യും. അതിനാൽ രാജ്യസുരക്ഷയെ ബാധിക്കുന്ന കാര്യങ്ങൾ രഹസ്യമായി തന്നെ വയ്‌ക്കണമെന്ന് അദ്ദേഹം പറഞ്ഞു.
ഇത്തരം കാര്യങ്ങളിൽ കേന്ദ്ര സർക്കാർ എന്നും സൈന്യത്തോടൊപ്പമുണ്ടാകുമെന്നും ചർച്ച അവസാനിപ്പിക്കുന്നതായിരിക്കും പ്രതിപക്ഷത്തിന് നല്ലത് എന്നും അദ്ദേഹം താക്കീത് നൽകി.
