പഠിക്കാനിരിക്കുമ്പോൾ അപ്പോൾ തന്നെ ഉറക്കം വരുന്നുവെന്ന പ്രശ്‌നം മിക്കവരെയും അലട്ടാറുണ്ട്. പുസ്തകമെടുത്ത് വായിക്കാൻ തുടങ്ങുമ്പോഴേക്കും ഉറക്കം കണ്ണുകളെ പിടികൂടും. ആറ്റുനോറ്റ് പഠിക്കാനിരുന്ന കക്ഷി പിന്നെ സുഖനിദ്രയിലാകും. എന്നാൽ ഇനി വിഷമിക്കേണ്ട.. പഠിക്കാനിരിക്കുമ്പോൾ ഇക്കാര്യങ്ങൾ ശ്രദ്ധിച്ചാൽ ഉറക്കം വരുന്നത് അകറ്റി നിർത്താം..
1. പഠിക്കാൻ വേണ്ടി ഇരിക്കുന്ന രീതി വളരെ പ്രധാനപ്പെട്ടതാണ്. ബെഡ്, സോഫ, തുടങ്ങി ഇരിക്കാൻ സുഖമുള്ള വസ്തുക്കളിലാണ് പഠിക്കാൻ ചെന്നിരിക്കുന്നതെങ്കിൽ നിങ്ങൾ ഉറക്കത്തെ കൂടി ക്ഷണിച്ചുവരുത്തുകയാണ് ചെയ്യുന്നത്. കംഫർട്ട് സോണിൽ നിന്ന് മാറി ഇരിക്കുകയാണ് ആദ്യം ചെയ്യേണ്ടത്.
2. തല താഴ്‌ത്തിയിരിക്കുന്നത് ഒഴിവാക്കുക. തലയുയർത്തി നേരെ പിടിച്ച് പുസ്തകം വായിക്കാൻ ശ്രമിക്കുന്നത് ഉറക്കത്തെ അകറ്റി നിർത്തും. നിവർന്ന് ഇരിക്കാനും ശ്രദ്ധിക്കുക.
3. പഠിക്കാൻ ഇരിക്കുന്നതിന് മുമ്പ് പ്ലാൻ ചെയ്യുക. ഈ സെഷനിൽ എത്ര പാഠഭാഗങ്ങൾ പഠിച്ചുതീർക്കണമെന്ന് മുൻകൂട്ടി നിശ്ചയിക്കുക. എത്ര നേരം ഇതിനായി വിനിയോഗിക്കണമെന്നും തീരുമാനിക്കുക. ശേഷം പഠനം ആരംഭിക്കുന്നത് ഉറക്കം വരുന്നത് തടയാൻ സഹായിക്കും.
4. ധാരാളം വെള്ളം കുടിക്കുക. ആവശ്യത്തിന് വെള്ളം കുടിച്ചില്ലെങ്കിൽ ക്ഷീണം വരുന്നതാണ്. ധാരാളം വെള്ളം കുടിച്ച് ശരീരത്തിലെ ജലാംശത്തിന്റെ അളവ് കൂട്ടുന്നത് ഉറക്കച്ചടവിനെ അകറ്റും.
5. ഭക്ഷണം ശ്രദ്ധിക്കുക. ആരോഗ്യദായകമായ ഭക്ഷണ പദാർത്ഥങ്ങൾ കഴിക്കാൻ ശ്രമിക്കുക. പഴങ്ങൾ, പച്ചക്കറികൾ, മുട്ട, മാംസം, മീൻ തുടങ്ങിയവ ഭക്ഷണ ക്രമീകരണത്തിൽ ഉൾപ്പെടുത്തുക.
6. പഠിക്കാനുള്ളത് വെറുതെ വായിച്ച് വിടാതെ പ്രധാന പോയിന്റുകൾ ഒരു പുസ്തകത്തിൽ കുറിച്ചിടുക. ഓരോ വിഷയം വായിച്ച് തീരുമ്പോഴും അതിന്റെ സംഗ്രഹം എഴുതാൻ ശ്രമിക്കുക.
7. വ്യത്യസ്ത രീതികളിലൂടെ പഠിക്കുക. ഒരേ രീതിയിൽ തന്നെ മണിക്കൂറുകളോളം തുടർന്ന് പഠിച്ചാൽ പെട്ടെന്ന് മടുത്ത് പോകുന്നതാണ്. മാത്രവുമല്ല ഉറക്കവും വരും. ഇതൊഴിവാക്കാൻ ഓരോ അരമണിക്കൂർ കൂടുമ്പോഴും പഠന രീതി മാറ്റുക. ഉദാഹരണമായി പ്രധാന പോയിന്റുകൾ ഹൈലൈറ്റ് ചെയ്ത് പഠിക്കുന്നതാണ് ആദ്യ രീതിയെങ്കിൽ അൽപ സമയം കഴിഞ്ഞാൽ എഴുതി പഠിക്കാവുന്നതാണ്.
8. പഠിക്കാനിരിക്കുന്നതിന് മുമ്പ് വ്യായാമം ചെയ്യുക. ഇത് നിങ്ങളെ ഉണർന്നിരിക്കാൻ കൂടുതൽ സഹായിക്കും. ശ്രദ്ധ കേന്ദ്രീകരിക്കാനും ഗുണം ചെയ്യും.
9. പകൽ പഠിക്കാനിരിക്കുന്നതിനിടയിൽ പത്ത് മിനിറ്റ് കിടന്നുറങ്ങുന്നത് നല്ലതാണ്. ഇത് കൂടുതൽ ഉണർന്ന് പഠിക്കാൻ സഹായിക്കും. ഉച്ചയ്‌ക്ക് 12.30നും രണ്ട് മണിക്കും ഇടയിൽ ഉറങ്ങുന്നതാണ് കൂടുതൽ നല്ലത്. പരമാവധി 15 മിനിറ്റ് ഉറങ്ങിയതിന് ശേഷം വീണ്ടും പഠിക്കാനിരുന്നാൽ ഓർമ്മശക്തി കൂട്ടാൻ ഉൾപ്പെടെ സഹായിക്കുമെന്നാണ് പറയപ്പെടുന്നത്.
10. വരികൾക്ക് അടിയിൽ കൈവിരലോ പേനയോ വച്ച് വായിക്കുന്ന രീതി നല്ലതാണ്. ഇത് ശ്രദ്ധ കേന്ദ്രീകരിക്കാനും ഉറക്കം വരുന്നത് തടയാനും സഹായിക്കുന്നു.
