കുഞ്ഞുങ്ങൾ വിരൽ കുടിക്കുന്നത് സാധാരണമായ കാര്യമാണ്. 6-7 മാസം പ്രായമാകുമ്പോൽ മുതൽ കുഞ്ഞുങ്ങളിൽ വിരൽ കുടിക്കുന്ന ശീലം ആരംഭിക്കും. കുട്ടികൾ ഇത് തനിയെ നിർത്തുമെങ്കിലും ചില കുട്ടികളിൽ ഈ ദുശ്ശീലം നിർത്താൻ മാതാപിതാക്കൾ തന്നെ മുന്നോട്ടുവരേണ്ടി വരും. നാല് വയസ് വരെ കുട്ടികൾ വിരൽ കുടിക്കുന്നത് സാധാരണമാണ്. എന്നാൽ അഞ്ച് വയസിന് ശേഷവും കുട്ടികൾ ശീലം തുടരുന്നുണ്ടെങ്കിൽ തീർച്ചയായും ഇത് തടയേണ്ടതുണ്ട്. കുട്ടിയുടെ താടിയെല്ലിന്റെയും പല്ലിന്റെയും വളർച്ചയെ ഉൾപ്പെടെ ബാധിക്കുന്ന ഒന്നാണ് വിരൽ കുടിക്കുകയെന്ന ദുശ്ശീലം.
അകറ്റാൻ ചെയ്യേണ്ട കാര്യങ്ങൾ:
വിരൽ കുടിക്കുന്നത് ദുശ്ശീലമാണെന്ന് കുട്ടികളോട് പറഞ്ഞുകൊടുക്കുകയാണ് ആദ്യം ചെയ്യേണ്ടത്. അവർ അനുസരിക്കുമ്പോൾ എന്തെങ്കിലും ഗിഫ്റ്റ് നൽകുകയോ അവർക്ക് സന്തോഷമുണ്ടാകുന്ന മറ്റെന്തെങ്കിലും കൊടുക്കുകയോ ചെയ്യാവുന്നതാണ്. കഥ കേൾക്കാൻ ഇഷ്ടമുള്ള കുട്ടിയാണെങ്കിൽ വിരൽ കുടിക്കാത്ത ദിവസം കഥ പറഞ്ഞുകൊടുക്കാം. ഇഷ്ടപ്പെട്ട ചോക്ലേറ്റ് വാങ്ങി നൽകാം. നല്ല കുട്ടിയാണെന്ന് പറഞ്ഞ് മറ്റുള്ളവരുടെ മുമ്പിൽ അനുമോദിക്കാം. ദുശ്ശീലം പതിയെ നിർത്തുമ്പോൾ അവരെ പുകഴ്ത്തുന്നത് വിരൽ കുടിക്കുന്നത് പൂർണമായി അകറ്റാൻ സഹായിക്കും.
ഏതെല്ലാം സാഹചര്യങ്ങളിലാണ് കുട്ടികൾ വിരൽ കുടിക്കുന്നതെന്ന് തിരിച്ചറിയുക. ടെൻഷനോ പേടിയോ ആകാംക്ഷയോ വരുമ്പോൾ ചില കുട്ടികൾ വിരൽ കുടിക്കും. അതുമല്ലെങ്കിൽ വിശക്കുമ്പോൾ, ബോറടിക്കുമ്പോൾ, ശ്രദ്ധ കിട്ടാതാകുമ്പോൾ തുടങ്ങി പല കാരണങ്ങളാലും വിരൽ കുടിക്കുന്നവരുണ്ട്. കാരണം കണ്ടെത്തി അതിന് ആദ്യം പരിഹാരം തേടുകയാണ് ചെയ്യേണ്ടത്. ഉദാഹരണമായി കുഞ്ഞുങ്ങൾ ബോറടിക്കുമ്പോഴാണ് വിരൽ കുടിക്കുന്നതെന്ന് കണ്ടെത്തിയാൽ ബോറടി മാറ്റാൻ വേണ്ടത് ചെയ്ത് കൊടുക്കാവുന്നതാണ്. തൽഫലമായി വിരൽ കുടിക്കുന്നതും നിൽക്കും.
ദുശ്ശീലം നിർത്തിയ ശേഷം ഇടയ്ക്ക് വീണ്ടും വിരൽ കുടിക്കാൻ ആരംഭിക്കുമ്പോൾ കുട്ടിയെ വഴക്കു പറയാതിരിക്കുക. ചെയ്യരുതെന്ന കാര്യം മറന്നുപോയിട്ടാകാം ഒരുപക്ഷെ കുട്ടി വീണ്ടും വിരൽ കുടിക്കാൻ ആരംഭിച്ചത്. ആ സമയത്ത് ദേഷ്യപ്പെടാതെ കുട്ടിയെ പറഞ്ഞ് മനസിലാക്കുക. ഒരിക്കലും മറ്റുള്ളവരുടെ മുമ്പിൽ വച്ച് ഇക്കാര്യം പറഞ്ഞ് കുട്ടിയെ മോശമായി ചിത്രീകരിക്കാതിരിക്കുക.
ദുശ്ശീലം മാറ്റാത്ത കുട്ടികളുടെ വിരലിൽ ആര്യവേപ്പ് അരച്ച് പുരട്ടി കൊടുക്കാവുന്നതാണ്. ഇത്തരത്തിൽ ശരീരത്തിന് ഹാനികരമല്ലാത്തതും സ്വാദില്ലാത്തതുമായ ഏത് ഭക്ഷ്യവസ്തുവും വിരലിൽ തേച്ചുകൊടുക്കാം.
കുട്ടികളെ പുതിയ ശീലങ്ങൾ പഠിപ്പിക്കുക. ഇതുവഴി വിരൽ കുടിക്കണമെന്ന ചിന്ത കുട്ടികൾ മറന്നുപോകുന്നതാണ്. പെയിന്റിംഗ്, കളറിംഗ് തുടങ്ങിയവ കുട്ടികളെ പഠിപ്പിക്കാം. അതുമല്ലെങ്കിൽ ദന്ത ഡോക്ടറെ കാണിക്കുന്നതും വിരൽ കുടിക്കുന്ന ശീലം അകറ്റാൻ സഹായിക്കും.
