വയനാട്: കാറിന്റെ ബോണറ്റിനുള്ളിൽ രാജവെമ്പാലയെ കണ്ടെത്തി. വയനാട് കാട്ടിക്കുളത്താണ് സംഭവം. പ്രദേശത്തെ പനവല്ലി റോഡിൽ താമസിക്കുന്ന പുഷ്പജന്റെ വീട്ടിലെ കാറിനുള്ളിലാണ് രാജവെമ്പാല കയറിപ്പറ്റിയത്.
പകൽ സമയത്ത് ഒരു പാമ്പ് ഇഴഞ്ഞ് കാർ ഷെഡ്ഡിനകത്തേക്ക് പോകുന്നത് വീട്ടുകാർ കണ്ടിരുന്നു. അത് ചേരയാണെന്നാണ് കരുതിയിരുന്നത്. എന്നാൽ രാത്രിയായപ്പോൾ സംശയം തോന്നി ബോണറ്റ് തുറന്നു നോക്കിയപ്പോഴാണ് ബോണറ്റിനുള്ളിൽ രാജവെമ്പാല കുടുങ്ങി കിടക്കുന്നത് കണ്ടത്.
തുടർന്ന് വനംവകുപ്പിനെയും പാമ്പുപിടുത്ത വിദഗ്ധരെയും വിവരമറിയിച്ചു. ഏറെ നേരത്തെ പരിശ്രമത്തിന് ഒടുവിലാണ് രാജവെമ്പാലയെ പുറത്തെടുക്കാനായത്. ശേഷം വനംവകുപ്പ് ഉദ്യോഗസ്ഥരും പോലീസും ചേർന്ന് പാമ്പിനെ വനമേഖലയിൽ തുറന്നുവിട്ടു.
