ബാഹുബലി എന്ന ഒറ്റ ചിത്രത്തിലൂടെ ലോകമെമ്പാടും ആരാധകരെ സൃഷ്ടിച്ച താരമാണ് പ്രഭാസ്. രാജമൗലി സംവിധാനം ചെയ്ത ബ്രഹ്മാണ്ഡ ചിത്രം താരത്തിന്റെ തന്നെ കരിയർ മാറ്റി മറിച്ചു. നിരവധി ആരാധികമാരും താരത്തിനുണ്ട്. എന്നാൽ, തങ്ങളുടെ പ്രിയ താരം അവിവാഹിതനായി കഴിയുന്നത് ആരാധകരെ തെല്ലൊന്നുമല്ല നിരാശരാക്കുന്നത്. ഇപ്പോഴിതാ, ജനപ്രിയ തെലുങ്ക് ചാറ്റ് ഷോയായ അൺസ്റ്റോപ്പബിളിന്റെ വരാനിരിക്കുന്ന എപ്പിസോഡിൽ നടൻ പ്രഭാസ് തന്റെ വിവാഹ ജീവിതത്തെപ്പറ്റി തുറന്നു പറയുകയാണ്. അൺസ്റ്റോപ്പബിൾ ഷോയുടെ പുതിയ പ്രൊമോ വീഡിയോയിൽ അവതാരകനായ നടൻ നന്ദമൂരി ബാലകൃഷ്ണ പ്രഭാസിനോട് പ്രണയത്തെപ്പറ്റിയും വിവാഹത്തെപ്പറ്റിയും ചോദിക്കുന്നത് കാണാം.
ഷോയുടെ വേദിയിലേയ്ക്ക് പ്രഭാസ് കടന്നു വരുമ്പോൾ തന്നെ പ്രേക്ഷകർ ആഹ്ലാദിക്കുന്നതും കയ്യടിക്കുന്നതും കാണാം. ചെറിയ പുഞ്ചിരിയോടു കൂടിയാണ് താരം വേദിയിലേയ്ക്ക് കടന്നു വരുന്നത്. അവതാരകനായ നന്ദമുരി ബാലകൃഷ്ണ സ്നേഹത്തോടെ അദ്ദേഹത്തെ സ്വാഗതം ചെയ്യുന്നതും പ്രമോ വീഡിയോയിൽ കാണാം. ‘നിങ്ങൾ എന്നെ പ്രിയേ എന്ന് അഭിസംബോധന ചെയ്യണം’ എന്നാണ് നന്ദമുരി ബാലകൃഷ്ണ പ്രഭാസിനോട് പറയുന്നത്. പൊട്ടിച്ചിരിച്ചുകൊണ്ട് പ്രഭാസ് അത് സമ്മതിച്ചു.
എപ്പോഴാണ് വിവാഹം കഴിക്കാൻ പോകുന്നതെന്നാണ് നന്ദമൂരി ബാലകൃഷ്ണയുടെ അടുത്ത ചോദ്യം. ‘സൽമാൻ ഖാന് ശേഷം’ എന്ന് പ്രഭാസ് ചിരിച്ചു കൊണ്ട് മറുപടി പറയുന്നതും പ്രമോ വീഡിയിൽ കാണാം. നടി കൃതി സനോനും പ്രഭാസും ഇഷ്ടത്തിലാണ് എന്ന തരത്തിലുള്ള വാർത്തകൾ നേരത്തെ പ്രചരിച്ചിരുന്നു. ആദിപുരുഷിൽ ഇരുവരും ഒരുമിച്ച് അഭിനയിച്ചതിന് പിന്നാലെയാണ് പ്രണയ വാർത്തകൾക്ക് തുടക്കമിട്ടത്. ‘ജലക് ദിഖ്ല ജാ’ എന്ന പരിപാടിയിൽ പങ്കെടുക്കുമ്പോൾ കൃതിയുടെ പ്രണയത്തെപ്പറ്റി വരുൺ ധവാൻ തമാശ പറഞ്ഞതോടെ ഗോസിപ്പുകൾ ധാരാളമായി വന്നു. എന്നാൽ ഈ വാർത്തകളെ തള്ളി കൃതിയും രംഗത്തു വന്നു.
Comments