കൊച്ചി: സിനിമാ പ്രേമികളിൽ വീണ്ടും സസ്പെൻസ് നിറച്ച് മോഹൻലാൽ. താരം തന്റെ സമൂഹമാദ്ധ്യമ അക്കൗണ്ടിലൂടെ പുറത്ത് വിട്ട വീഡിയോ ആണ് പ്രേക്ഷകരെ വീണ്ടും ആശയക്കുഴപ്പത്തിലാക്കിയിരിക്കുന്നത്. ടൈറ്റിൽ തയ്യാറാക്കുന്നതിന്റെ വീഡിയോയാണ് മോഹൻലാൽ ഇപ്പോൾ പങ്കുവച്ചിരിക്കുന്നത്. ‘മലയാളത്തിന്റെ മോഹൻലാൽ അവതരിക്കുന്ന ലിജോ ജോസ് പെല്ലിശ്ശേരി സിനിമ’ എന്ന ഭാഗവും വീഡിയോയിൽ ഉൾപ്പെടുത്തിയിട്ടുണ്ട്.
മോഹൻലാൽ-ലിജോ ജോസ് പെല്ലിശേരി കൂട്ടുകെട്ടിലൊരുങ്ങുന്ന പുതിയ ചിത്രത്തിന്റെ കഥാപശ്ചാത്തലത്തെ കുറിച്ച് യാതൊരു സൂചനയും നൽകാതെയാണ് ഒരു മിനിറ്റിലധികം ദൈർഘ്യമുള്ള വീഡിയോ അവസാനിക്കുന്നത്.
ഇരുവരും സമൂഹമാദ്ധ്യമങ്ങളിൽ പങ്കുവെച്ച ചിത്രങ്ങളോടൊപ്പം വീഡിയോ കൂട്ടിവായിക്കാൻ പലരും ശ്രമിച്ചെങ്കിലും ഒരു തുമ്പ് പോലും ലഭിച്ചില്ലെന്നാണ് സോഷ്യൽ മീഡിയയിലെ അടക്കം പറച്ചിൽ. സസ്പെൻസ് പൊളിയാൻ നാളെ ടൈറ്റിൽ പോസ്റ്റർ പുറത്ത് വരുന്നത് വരെ കാത്തിരിക്കണമെന്ന് സാരം.
രണ്ട് നിറത്തിലായി പരന്നുകിടക്കുന്ന മണൽതരികളും അതിലെ ചില അവ്യക്തരൂപങ്ങളുമാണ് ഇരുവരും കഴിഞ്ഞ ദിവസങ്ങളിൽ ഷെയർ ചെയ്തിരിക്കുന്നത്. ഒരു പക്ഷേ പസിൽ മാതൃകയിൽ സിനിമയുടെ ടൈറ്റിൽ പോസ്റ്ററിന്റെ ഓരോ ഭാഗങ്ങളായി നായകനും സംവിധായകനും പുറത്തുവിടുകയാണെന്ന സൂചനയാണ് ഇതിലൂടെ ലഭിക്കുന്നത്. എന്നാൽ ഇന്നത്തെ വീഡിയോയിലും ഉത്തരം ലഭിക്കാതെ വന്നതോടെ നാളെ വൈകുന്നേരം അഞ്ചു മണിയാകുന്നതും കാത്തിരിക്കുകയാണ് ആരാധകർ.
അതേസമയം, മോഹൻലാൽ ചിത്രത്തിന്റെ ഷൂട്ടിംഗ് ഉടൻ ആരംഭിക്കുമെന്ന് 27-ാമത് ഐഎഫ്എഫ്കെ വേദിയിൽ ലിജോ ജോസ് പെല്ലിശ്ശേരി പറഞ്ഞിരുന്നു.
