കാസർകോട്: ക്രിസ്മസ് ആഘോഷങ്ങളുടെ ഭാഗമായി സ്ഥാപിച്ച പുൽക്കൂട് നശിപ്പിച്ച സംഭവത്തിൽ അന്വേഷണം ആരംഭിച്ച് പോലീസ്. സംഭവത്തിൽ ശക്തമായ പ്രതിഷേധം ഉയർന്നതോയെയായിരുന്നു പോലീസ് അന്വേഷണം ആരംഭിച്ചത്. മുളിയാർ പ്രാഥമികാരോഗ്യ കേന്ദ്രത്തിൽ സ്ഥാപിച്ചിരുന്ന പുൽക്കൂട് ആണ് തകർത്തത്.
എരഞ്ഞിപ്പുഴ സ്വദേശി മുസ്തഫ അബ്ദുള്ളയാണ് പുൽക്കൂട് നശിപ്പിച്ചത്. ഇയാൾ പുൽക്കൂട് നശിപ്പിക്കുന്നതിന്റെ വീഡിയോ ദൃശ്യങ്ങൾ പുറത്തുവന്നിട്ടുണ്ട്. ഇതിൽ പേരും സ്വദേശവും മൊബൈൽ നമ്പറും ഇയാൾ വെളിപ്പെടുത്തുന്നുണ്ട്. ഇതെല്ലാം കേന്ദ്രീകരിച്ചാണ് അന്വേഷണം പുരോഗമിക്കുന്നത്.
കഴിഞ്ഞ ദിവസമായിരുന്നു സംഭവം. ക്രിസ്മസ് ആഘോഷത്തിന്റെ ഭാഗമായി ജീവനക്കാർ സ്ഥാപിച്ച പുൽക്കൂട് ആയിരുന്നു മുസ്തഫ നശിപ്പിച്ചത്. സർക്കാർ ആശുപത്രിയിലാണോ ഇതൊക്കെ വയ്‌ക്കുന്നത് എന്ന് ചോദിച്ച ഇയാൾ, ഉണ്ണിയേശുവിനെയുൾപ്പെടെ കൊണ്ടുപോയി കളയുകയായിരുന്നു. സംഭവത്തിൽ സമൂഹമാദ്ധ്യമങ്ങളിൽ ഉൾപ്പെടെ പ്രതിഷേധം ശക്തമാണ്.
