അമ്മ എന്ന വാക്കിന്റെ അർത്ഥം വർണ്ണിക്കാൻ കഴിയുന്ന ഒന്നല്ല. നമ്മുടെ ജീവിതത്തിന്റെ കരുത്ത് എന്നത് അമ്മ നൽകുന്ന സ്നേഹവും വാത്സല്യവും ധൈര്യവുമാണ്. മക്കൾ എവിടെയെങ്കിലും പോയിട്ട് വീട്ടിൽ വരാൻ താമസിച്ചാൽ തന്നെ അമ്മമാർക്ക് സഹിക്കാൻ കഴിയില്ല. അപ്പോൾ, മകൻ ഒരു സൈനികനായാലോ?. തന്റെ മക്കളെ സൈന്യത്തിൽ ചേരാൻ അനുവദിക്കുന്ന മാതാപിതാക്കൾക്ക് നമുക്ക് സല്യൂട്ട് നൽകിയേ മതിയാകൂ. രാജ്യത്തിന് വേണ്ടി സ്വയം സമർപ്പിച്ച് ഓരോ പട്ടാളക്കാരും അതിർത്തികളിലേയ്ക്ക് പോകുമ്പോൾ അവർക്കു വേണ്ടിയും രാജ്യത്തിന് വേണ്ടിയും പ്രാർത്ഥിക്കുന്നവരാണ് ഓരോ അമ്മമാരും. ഇപ്പോഴിതാ, ഒരു സൈനികന്റെയും അദ്ദേഹത്തിന്റെ അമ്മയുടെയും വീഡിയോയാണ് സമൂഹമാദ്ധ്യമങ്ങളിൽ വൈറലാകുന്നത്.
വിരമിക്കുന്നതിന് മുമ്പുള്ള അവസാന സല്യൂട്ട് തന്റെ അമ്മയ്ക്ക് അർപ്പിച്ച്, തനിക്ക് നൽകിയ സ്നേഹത്തിനും കരുതലിനും ആദരവ് പ്രകടിപ്പിച്ചിരിക്കുകയാണ് ഇന്ത്യൻ ആർമിയിലെ ഒരു ഉദ്യോഗസ്ഥൻ. തന്റെ മകന്റെ സല്യൂട്ട് ഏറ്റു വാങ്ങുമ്പോൾ ആ അമ്മയുടെ മുഖത്തുണ്ടാകുന്ന സന്തോഷവും അഭിമാനവും വീഡിയോ കാണുന്നവരുടെ കണ്ണ് നനയ്ക്കും. മേജർ ജനറൽ രഞ്ജൻ മഹാജനാണ് ഹൃദ്യമായ വീഡിയോ ഇൻസ്റ്റഗ്രാമിൽ പങ്കുവെച്ചിരിക്കുന്നത്.
This officer’s pre-retirement salute to his own mom is winning the inter… https://t.co/cmkYjBOSDE via @YouTube
— Ranjan Mahajan (@iranjanmahajan) December 23, 2022
സൈനിക യൂണിഫോം ധരിച്ച് വീടിനകത്തേയ്ക്ക് മാർച്ച് ചെയ്താണ് സൈനികൻ കടന്നു വരുന്നത്. സോഫയിൽ ഇരിക്കുന്ന അമ്മയുടെ അരികിലെത്തി മകൻ സല്യൂട്ട് ചെയ്യുന്നു. ഇത് കണ്ട് സന്തോഷത്തോടെ അമ്മ എണീറ്റ് തിരിച്ച് സല്യൂട്ട് ചെയ്യുന്നതും വീഡിയോയിൽ കാണാം. ആ വൈകാരിക നിമിഷത്തിൽ അമ്മയും മകനും പരസ്പരം ആലിംഗനം ചെയ്യുകയാണ്. അമ്മയ്ക്ക് ഒരു മാലയും മകൻ സമ്മാനിക്കുന്നുണ്ട്. അമ്മയാണ് ഇന്ത്യൻ ആർമിയുടെ യൂണിഫോം അണിയാൻ തന്നെ യോഗ്യനാക്കിയതെന്ന് മേജർ ജനറൽ രഞ്ജൻ മഹാജൻ പറയുന്നു.
Comments