ലണ്ടൻ: രോഗികൾക്ക് തെറ്റായ സന്ദേശം അയച്ച് പേടിപ്പിച്ച് ആശുപത്രി. യുകെയിലെ ഒരു മെഡിക്കൽ സെന്ററിൽ നിന്നാണ് സ്ഥിരം സന്ദർശകരായ രോഗികൾക്ക് അബദ്ധ സന്ദേശം ലഭിച്ചത്. ക്രിസ്തുമസിനോട് അനുബന്ധിച്ച് എല്ലാവർക്കും “Merry Christmas” അയക്കാനായിരുന്നു മെഡിക്കൽ സെന്റർ ജീവനക്കാർ ഉദ്ദേശിച്ചിത്. ഇതിനായി ആയിരം രോഗികളുടെ കോൺടാക്ട് നമ്പറും തിരഞ്ഞെടുത്തു. എന്നാൽ “Merry Christmas” ന് പകരം നിങ്ങൾക്ക് അർബുദമുണ്ടെന്നായിരുന്നു അബദ്ധത്തിൽ അയച്ചത്.
സൗത്ത് യോർക്ക്ഷെയറിലുള്ള അസ്കേൺ മെഡിക്കൽ പ്രാക്ടീസിൽ നിന്നാണ് രോഗികൾക്ക് ഇത്തരമൊരു സന്ദേശം ലഭിച്ചത്. ക്രിസ്തുമസ് ദിനത്തിന്റെ തലേദിവസമായിരുന്നു സംഭവം. നിങ്ങൾക്ക് വളരെ ഭയാനകമായ ശ്വാസകോശ ക്യാൻസർ പിടിപെട്ടിരിക്കുന്നു എന്നായിരുന്നു സന്ദേശം. ഒപ്പം ഒരു ഫോം പൂരിപ്പിക്കാനുള്ള ലിങ്കും ഉൾപ്പെടുത്തിയിരുന്നു. അസുഖബാധിതരായ ആളുകൾ ചികിത്സാ ചെലവുകൾക്ക് ആനുകൂല്യം ലഭിക്കാൻ പൂരിപ്പിക്കേണ്ട ഫോമായിരുന്നു അത്.
ഫോമിന്റെ ലിങ്കും ഒപ്പമുള്ള സന്ദേശവും കൂടിയായപ്പോൾ മെസേജ് വായിച്ച രോഗികൾ പരിഭ്രാന്തരായി. സന്ദേശമയച്ചതിൽ ചെറിയ പിശക് പറ്റിയെന്ന് അൽപ സമയത്തിന് ശേഷം ആശുപത്രി അധികൃതർ തിരിച്ചറിഞ്ഞു. തൊട്ടുപിന്നാലെ ക്ഷമ ചോദിച്ചുകൊണ്ടുള്ള അടുത്ത സന്ദേശം ആയിരം രോഗികൾക്കും അയച്ചു. “ക്രിസ്തുമസ് – പുതുവത്സരാശംസകൾ എന്ന് അയക്കാനായിരുന്നു ഉദ്ദേശിച്ചത്. പക്ഷെ തെറ്റിപോയി. ദയവായി ക്ഷമിക്കണം.” എന്നായിരുന്നു രണ്ടാമത്തെ സന്ദേശം.
മെഡിക്കൽ സെന്ററിൽ പലവിധ ചെക്കപ്പുകൾ നടത്തി ഫലം ലഭിക്കുന്നതിനായി കാത്തിരുന്ന രോഗികൾക്കും തെറ്റായ സന്ദേശം ലഭിച്ചിരുന്നു. പരിശോധനയിൽ തനിക്ക് അർബുദം ബാധിച്ചുവെന്ന് സ്ഥിരീകരിച്ചതായി അവർ കരുതി. പലർക്കും തലച്ചുറ്റലും ദേഹാസ്വാസ്ഥ്യവും അനുഭവപ്പെട്ടു. തൊട്ടുപിന്നാലെ ക്ഷമാപണ സന്ദേശം വരികയും അത് വായിക്കുകയും ചെയ്തപ്പോഴാണ് ശ്വാസം നേരെ വീണതെന്നും ചില രോഗികൾ പ്രതികരിച്ചു.
