രജനി ആരാധകരും സിനിമാ പ്രേമികളും ഏറെ ആകാംക്ഷയോടെ കാത്തിരിക്കുന്ന ചിത്രമാണ് നെൽസൺ തിരക്കഥ ഒരുക്കി സംവിധാനം ചെയ്യുന്ന ജയിലർ. ചിത്രത്തിന്റെ ടീസർ വന്നതു മുതൽ ആരാധകർ ആവേശത്തിലാണ്. ഇപ്പോഴിതാ, മലയാളി പ്രേക്ഷകർക്ക് സന്തോഷം തരുന്ന ഒരു വാർത്തയാണ് ജയിലർ സിനിമയുമായി ബന്ധപ്പെട്ട് പുറത്തു വരുന്നത്. ചിത്രത്തിൽ മോഹൻലാലും അഭിനയിക്കുന്നുണ്ട് എന്നുള്ള റിപ്പോർട്ടുകളാണ് സമൂഹമാദ്ധ്യമങ്ങളിൽ വൈറലാകുന്നത്. ദേശീയ മാദ്ധ്യമങ്ങളടക്കം സമൂഹമാദ്ധ്യമങ്ങളിൽ പ്രത്യക്ഷപ്പെട്ട സൂചനകൾ വാർത്തയാക്കിയിരിക്കുകയാണ്.
ഒരു അതിഥി വേഷത്തിലാകും രജനികാന്ത് ചിത്രത്തില്‍ മോഹൻലാൽ എത്തുന്നത്. രണ്ടോ മൂന്നോ ദിവസത്തെ ഷൂട്ടിംഗാണ് താരത്തിന് ഉണ്ടാകുക എന്നും സാമൂഹ്യമാദ്ധ്യമങ്ങളില്‍ ട്രേഡ് അനലിസ്റ്റുകള്‍ അടക്കമുള്ളവര്‍ പറയുന്നു. കന്നഡ താരം ശിവരാജ്‍ കുമാറും ചിത്രത്തിൽ അഭിനയിക്കുന്നുണ്ട് എന്നത് വലിയ വാർത്ത ആയിരുന്നു. രമ്യാ കൃഷ്‍ണനും ജയിലറിൽ പ്രധാന വേഷത്തിലെത്തുന്നു.
സ്റ്റണ്ട് ശിവയാണ് ചിത്രത്തിന്റെ ആക്ഷൻ കൊറിയോഗ്രാഫര്‍. അനിരുദ്ധ് രവിചന്ദര്‍ സംഗീതം പകരുന്നു. വിജയ് കാര്‍ത്തിക് കണ്ണനാണ് ഛായാഗ്രാഹണം നിർവ്വഹിക്കുന്നത്. റാമോജി റാവു ഫിലിം സിറ്റിയിലടക്കം ചിത്രത്തിന്റെ ഷൂട്ടിംഗ് നടന്നിരുന്നു. ‘അണ്ണാത്തെ’യ്‌ക്കു ശേഷം എത്തുന്ന രജനികാന്ത് ചിത്രമാണ് ‘ജയിലര്‍’. സണ്‍ പിക്ചേഴ്‍സിന്റെ ബാനറില്‍ കലാനിധി മാരനാണ് ചിത്രം നിര്‍മ്മിക്കുന്നത്.
