ന്യൂഡൽഹി: മൂടൽമഞ്ഞിനെ തുടർന്ന് രാജ്യതലസ്ഥാനത്ത് നിന്നുള്ള നിരവധി വിമാന സർവീസുകൾ വൈകി. ഡൽഹി ഇന്ദിരാഗാന്ധി അന്താരാഷ്‌ട്ര വിമാനത്താവളത്തിൽ നിന്ന് പുറപ്പെടേണ്ട ആറ് വിമാനങ്ങളാണ് പ്രതികൂല കാലാവസ്ഥയെ തുടർന്ന് വൈകിയത്.
ഡൽഹി-സാൻഫ്രാൻസിസ്‌കോ, ഡൽഹി-ചണ്ഡീഗഡ്-കുളു, ഡൽഹി-ജയ്പൂർ, ഡൽഹി-ധർമശാല-ചണ്ഡീഗഢ്, ഡൽഹി-ഷിംല-ധർമശാല, ഡൽഹി-ഡെറാഡൂൺ എന്നീ വിമാന സർവീസുകളെയാണ് കടുത്ത മൂടൽമഞ്ഞ് ബാധിച്ചത്.
സഫ്ദർജംഗിലെ ഇന്നത്തെ ഏറ്റവും കുറഞ്ഞ താപനില 5.9 ഡിഗ്രി സെൽഷ്യസാണ്. പാലം കോളനിയിൽ നിന്നുള്ള ദൂരകാഴ്ച 100 മീറ്ററായതായും കാലാവസ്ഥ നിരീക്ഷണകേന്ദ്രം രേഖപ്പെടുത്തി. ഈ വർഷം ആദ്യം മുതൽ തന്നെ കടുത്ത ശൈത്യമാണ് ഡൽഹിയിൽ അനുഭവപ്പെട്ടത്. പഞ്ചാബ്, രാജസ്ഥാൻ, ജമ്മു-കശ്മീർ, ഹരിയാന, ചണ്ഡീഗഡ്, ഉത്തർപ്രദേശ്, ബിഹാർ, ത്രിപുര എന്നീ സംസ്ഥാനങ്ങളിലും കടുത്ത ശൈത്യമാണ് അനുഭവപ്പെടുന്നത്.
Comments