കലിയുഗവരദനായ സ്വാമി അയ്യപ്പൻ പ്രധാന പ്രതിഷ്ഠയായ ആദ്യക്ഷേത്രമാണ് ന്യൂയോർക്ക് വേൾഡ് അയ്യപ്പസേവാ ട്രസ്റ്റ് ക്ഷേത്രം. അയ്യപ്പ ഭക്തിയിലും വിശ്വാസത്തിലും ലയിച്ച് ജീവിക്കുന്ന അമേരിക്കൻ മലയാളികളുടെ ‘ഗുരുസ്വാമി’ പാർത്ഥസാരഥി പിള്ളയുടെ സ്വപ്ന സാക്ഷാത്ക്കാരമായ ക്ഷേത്രത്തിലെ പ്രധാന വിഗ്രഹപ്രതിഷ്ഠ 2015-ലായിരുന്നു. വിധിപ്രകാരം കേരളത്തിൽ നിർമ്മിച്ച് ആചാരാനുഷ്ഠാനങ്ങളോടെ എത്തിച്ച ശബരിമല ശാസ്താവിന്റെയും ഉപദേവതകളായ ഗണപതിയുടെയും ഹനുമാന്റെയും പഞ്ചലോഹ വിഗ്രഹങ്ങൾ സൂര്യകാലടി മനയിലെ സൂര്യൻ സുബ്രഹ്മണ്യൻ ഭട്ടതിരിപ്പാടാണ് പ്രതിഷ്ഠിച്ചത്. ശബരിമലയിലെ അയ്യപ്പവിഗ്രഹത്തിന്റെ അതേ വലിപ്പത്തിലും രൂപത്തിലുമാണ് വിഗ്രഹം നിർമ്മിച്ചിരിക്കുന്നത്.
ബിംബ പരിഗ്രഹപൂജ, ജലാതി വാസം,നേത്രോ വിഖനം, നേത്രോ ലേഖനം, ജീവകലശ പൂജകൾ, അധിവാസ പൂജ, പിഠ പ്രതിഷ്ഠ, ബിംബ പ്രതിഷ്ഠ, പഠിത്തര സമർപ്പണം എന്നീ പൂജകൾ താന്ത്രിക വിധിപ്രകാരം നടത്തുന്നു. തുടർന്ന് ശിവൻ, ശ്രീകൃഷ്ണൻ, മുരുകൻ, ദേവയാനി,മഹാലക്ഷ്മി, നവഗ്രഹങ്ങൾ എന്നീ ഉപദേവതകളുടെ പ്രതിഷ്ഠകളും നടന്നു.
മണ്ഡല മകരവിളക്ക് ഉത്സവത്തിന് മാത്രമല്ല ശിവരാത്രി,വിനായക ചതുർത്ഥി, അഷ്ടമി,രോഹിണി,ശിവരാത്രി, നവരാത്രി,കാർത്തികവിളക്ക്,ദീപാവലി തുടങ്ങിയ പ്രധാന വിശേഷദിനങ്ങൡ പ്രത്യേക പൂജകളും വഴിപാടുകളും നടത്തുന്നു. ശനിപൂജ,സത്യനാരായണ പൂജ, ജന്മനക്ഷത്ര പൂജ, അന്നപ്രാശം, വിവാഹം എന്നിവയും ക്ഷേത്രത്തിൽ നടത്തുന്നു.
മകരവിളക്ക് ദിനത്തിലും ശബരിമലയുടേതിന് സമാനമായ രീതിയിലാണ് ക്ഷേത്രത്തിലും കാര്യങ്ങൾ നടന്നത്. എല്ലാ ദിവസവും സുപ്രഭാതം പാടി നടതുറക്കും. അഷ്ടാഭിഷേകത്തോടെ പൂജകൾ ആരംഭിക്കും. പടിപൂജ, ഉച്ചപൂജ,ഭജന,. ദീപാരാധന, മഹാ മംഗളാരതി അങ്ങനെ പോകുന്നു പൂജകൾ , ഹരിവരാസനം പാടിയാണ് നട അടയ്ക്കുന്നത്. മണ്ഡലകാലം തുടങ്ങി ഒരു ദിവസം പോലും മുടങ്ങാതെ പടിപൂജ നടത്താൻ ഭക്തർ തയ്യാറായി. മകരവിളക് ദിനത്തിൽ ഉച്ചയ്ക്ക് പമ്പാസദ്യ,ഇരുമുടി ഏന്തി എത്തുന്ന അയ്യപ്പന്മാരുടെ നിവേദ്യസമർപ്പണം,പുഷ്പാലങ്കാരം, മംഗളാരതി, പ്രസാദവിതരണം എന്നിവയാണ് നടന്നത്.
ഭഗവാൻ അയ്യപ്പസ്വാമിയുടെ അനുഗ്രഹം കൊണ്ടാണ് കേരളത്തിലെ ഒരു കൊച്ചുഗ്രാമത്തിൽ നിന്ന് തനിക്ക് അമേരിക്കയിൽ ഇത്തരമൊരു ക്ഷേത്രം സാധ്യമാക്കാൻ കഴിഞ്ഞെന്നാണ് പാർത്ഥിസാരഥി പിള്ള പറയുന്നത്. പത്തനംതിട്ട റാന്നി സ്വദേശിയാണ് ഇദ്ദേഹം.
