ന്യൂഡൽഹി: രാജ്യതലസ്ഥാനത്ത് വായു ഗുണനിലവാരം മോശമായി തുടരുന്നു. വായു ഗുണനിലവാരത്തിന്റെയും കാലാവസ്ഥ സൂചികയുടെയും അടിസ്ഥാനത്തിൽ വരും ദിവസങ്ങളിൽ വായുവിന്റെ ഗുണനിലവാരം കൂടുതൽ വഷളാകുമെന്നാണ് സിസ്റ്റം ഓഫ് എയർ ക്വാളിറ്റി ആൻഡ് വെതർ ഫോർക്കാസ്റ്റിംഗ് (എസ്എഎഫ്എആർ) പഠനം പറയുന്നത്. വായു ഗുണനിലവാരത്തിന്റെയും കാലാവസ്ഥ സൂചികയുടെയും അടിസ്ഥാനത്തിലാണ് മുന്നറിയിപ്പ്.
വായുമലിനീകരണം രൂക്ഷമാകുന്ന സാഹചര്യത്തിൽ ജനങ്ങൾ കഴിവതും അതിരാവിലെയോ വൈകുന്നേരങ്ങളിലോ മാത്രം പുറത്തിറങ്ങാനാണ് ഭൂമി ശാസ്ത്ര മന്ത്രാലയത്തിന്റെ നിർദ്ദേശം. എൻ-95 അല്ലെങ്കിൽ പി-100 മാസ്കുകൾ ഉപയോഗിക്കാനും നിർദ്ദേശം നൽകിയിട്ടുണ്ട്.
എയർ ക്വാളിറ്റി ആൻഡ് വെതർ ഫോർകാസ്റ്റിങ് റിസർച്ചിന്റെ റിപ്പോർട്ട് പ്രകാരം കഴിഞ്ഞ ശനിയാഴ്ച ഡൽഹിയിലെ വായുനിലവാര സൂചിക 303 ആയിരുന്നു. വായു മലിനീകരണം രൂക്ഷമാകുന്നതിന്റെ സൂചനയാണ് ഇതെന്ന് കേന്ദ്ര കാലാവസ്ഥ വകുപ്പ് വ്യക്തമാക്കി.
കേന്ദ്ര കാലാവസ്ഥാ വകുപ്പിന്റെ നിർദ്ദേശ പ്രകാരം വായുമലിനീകരണം ഹൃദ്രോഗത്തിനും ശ്വാസകോശ സംബന്ധമായ അസുഖങ്ങൾക്കും കാരണമാകുമെന്നതിനാൽ ജനങ്ങൾ ജാഗ്രത പാലിക്കാനും നിർദേശമുണ്ട്.
വായു നിലവാര സൂചിക 0 മുതൽ 100 വരെയാണെങ്കിൽ വായുവിന്റെ ഗുണനിലവാരം നല്ലാതായി കണക്കാക്കുന്നു. 100 മുതൽ 200 വരെ വായുവിന്റെ തീക്ഷണത കുറയുന്നതായും 200 മുതൽ 300 വരെ മോശമായും 300 മുതൽ 400 വരെ വളരെ മോശമായും 400 മുതൽ 500 വരെ നിലവാരം അതികഠിനവുമാണ്.
