ന്യൂഡൽഹി: 2023 ജനുവരി മാസത്തിലെ ജിഎസ്ടി വരുമാനം പ്രഖ്യാപിച്ച് കേന്ദ്ര സർക്കാർ. 1.55 ലക്ഷം കോടി രൂപയാണ് ജനുവരിയിൽ ജിഎസ്ടി ഇനത്തിൽ ലഭിച്ചതെന്ന് ധനമന്ത്രാലയം വ്യക്തമാക്കി. ജനുവരി 31ന് വൈകിട്ട് അഞ്ച് മണി വരെയുള്ള കണക്കാണിത്. ജിഎസ്ടിയായി ലഭിച്ച 1,55,922 കോടി രൂപയിൽ 28,963 കോടി രൂപ കേന്ദ്ര വിഹിതവും 36,730 കോടി രൂപ സംസ്ഥാന വിഹിതവുമാണ്.
ചരക്കുകളുടെ ഇറക്കുമതിയിൽ നിന്നും നേടിയ 37,118 കോടി രൂപ ഉൾപ്പെടെ ആകെ 79,599 കോടി രൂപയാണ് ഐജിഎസ്ടി. ഇറക്കുമതിയിൽ ചുമത്തിയ സെസ് തുകയായ 768 കോടി രൂപ അടക്കം 10,630 കോടി രൂപയാണ് ആകെ സെസ് ലഭിച്ചതെന്നും ധനമന്ത്രാലയം അറിയിച്ചു.
കഴിഞ്ഞ സാമ്പത്തിക വർഷത്തേക്കാൾ 24 ശതമാനം അധിക വരുമാനം ജനുവരിയിൽ ലഭിച്ചിട്ടുണ്ട്. നടപ്പ് സാമ്പത്തിക വർഷത്തിൽ മൂന്നാം തവണയാണ് ജിഎസ്ടി വരുമാനം 1.50 ലക്ഷം കോടി കവിയുന്നത്. ഇതുവരെ ലഭിച്ചതിൽ വച്ച് ഏറ്റവും വലിയ രണ്ടാമത്തെ ജിഎസ്ടി വരുമാനം ഇത്തവണത്തേതാണ്. 2022 ഏപ്രിലിലായിരുന്നു ഏറ്റവുമധികം (1.68 ലക്ഷം കോടി രൂപ) ജിഎസ്ടി വരുമാനം ലഭിച്ചത്.
Comments