അഗർത്തല: തിരഞ്ഞെടുപ്പ് പ്രചരണ പ്രവർത്തനങ്ങൾക്ക് നേതൃത്വം നൽകിക്കൊണ്ട് ബിജെപി ദേശീയ അദ്ധ്യക്ഷൻ ജെ.പി നദ്ദ ത്രിപുരയിൽ. വിജയ് സങ്കൽപ് റാലിയെ അഭിസംബോധന ചെയ്ത് സംസാരിച്ച അദ്ദേഹം ബിജെപി സംസ്ഥാന ഘടകം സംഘടിപ്പിച്ച വിവിധ പ്രചരണ പരിപാടികളിലും പങ്കെടുത്തു.
സത്രീകളുടെയും കുട്ടികളുടെയും പാവപ്പെട്ടവരുടെയും സുരക്ഷ ഉറപ്പാക്കാനാണ് ബിജെപി സർക്കാർ കൂടുതൽ മുൻഗണന നൽകുന്നതെന്ന് വിജയ് സങ്കൽപ് യാത്രയിൽ പങ്കെടുത്തുകൊണ്ട് നദ്ദ പറഞ്ഞു. അഞ്ച് വർഷം മുൻപ് ഉണ്ടായിരുന്ന ത്രിപുരയല്ല ഇപ്പോൾ ഉള്ളതെന്നും സമസ്ത മേഖലകളിലും സംസ്ഥാനം പുരോഗതി കൈവരിച്ചതായും അദ്ദേഹം വ്യക്തമാക്കി. ഉജ്ജ്വല യോജന, ആവാസ് യോജന തുടങ്ങിയ പദ്ധതികൾ ജനജീവിതത്തെ മാറ്റിമറിച്ചുവെന്നും വനവാസി സമൂഹത്തെ ശാക്തീകരിക്കാനായി സർക്കാർ സ്വീകരിച്ച നടപടികൾ സംസ്ഥാനത്ത് ഫലം കണ്ടുവെന്നും അദ്ദേഹം കൂട്ടിച്ചേർത്തു.
പ്രധാനമന്ത്രി നരേന്ദ്രമോദിയുടെ നേതൃത്വത്തിൽ രാജ്യം വികസന കുതിപ്പ് നടത്തുകയാണെന്നും അതിനൊപ്പം ത്രിപുരയും വളരുകയാണെന്നും നദ്ദ പറഞ്ഞു. അഞ്ച് വർഷമുമ്പ് സംസ്ഥാനത്ത് വികസന പ്രവർത്തനങ്ങൾ ഒന്നും തന്നെ നടക്കാത്ത സ്ഥിതിയായിരുന്നുവെന്നും അദ്ദേഹം കൂട്ടിച്ചേർത്തു.
പ്രചരണത്തിന്റെ ഭാഗമായി സംസ്ഥാനത്ത് മുഖ്യമന്ത്രി മാണിക് സാഹയുടെ നേതൃത്വത്തിൽ ഗൃഹസമ്പർക്കവും നടത്തിവരുകയാണ്. കേന്ദ്രമന്ത്രി സമൃതി ഇറാനി, ചലച്ചിത്രതാരം മിഥുൻ ചക്രവർത്തി തുടങ്ങിയവർ വിവിധ പ്രചരണ പരിപാടികളിൽ പങ്കെടുത്തിരുന്നു.
