ന്യൂഡൽഹി: ബിൽ ഗേറ്റ്സ് ഉണ്ടാക്കിയ റൊട്ടിക്ക് പ്രധാനമന്ത്രി നരേന്ദ്ര മോദിയുടെ പ്രശംസ. ഒപ്പം ഇന്ത്യയിലെ പരമ്പരാഗത ചെറുധാന്യങ്ങൾ കൊണ്ടുള്ള വിഭവങ്ങൾ പരീക്ഷിക്കാൻ നിർദ്ദേശവും. പ്രശസ്ത വിദേശ ബ്ലോഗർ എയ്തൻ ബെർനാതിനൊപ്പം റൊട്ടി ഉണ്ടാക്കുന്ന വീഡിയോ ബിൽ ഗേറ്റ്സ് കഴിഞ്ഞ ദിവസം ഇൻസ്റ്റഗ്രാമിൽ പോസ്റ്റ് ചെയ്തിരുന്നു. ഈ വീഡിയോ പ്രധാനമന്ത്രിയുടെ ഇൻസ്റ്റഗ്രാം സ്റ്റോറിയായി ഷെയർ ചെയ്ത ശേഷം അദ്ദേഹം ഒരു സന്ദേശവും ചേർത്തു. ഇന്ത്യയിലെ പുതിയ ട്രെൻഡ് ചെറുധാന്യങ്ങൾ കൊണ്ടുള്ള ഭക്ഷണ പദാർത്ഥങ്ങളാണെന്നും നിരവധി ചെറുധാന്യങ്ങൾ ഇന്ത്യയിൽ ഉണ്ടെന്നും അവയിൽ ഏതെങ്കിലും ഒന്ന് പരീക്ഷിക്കൂ എന്നുമായിരുന്നു സന്ദേശം.
ഇതിന് മറുപടിയായി ബെർനാത് മറ്റൊരു വീഡിയോ പങ്കുവെച്ചു.താൻ ബീഹാറിൽ നിന്നാണ് വന്നത്. അവിടെയുള്ള ഗോതമ്പ് കർഷകരുടെ കൃഷി രീതികൾ മനസ്സിലാക്കിയിട്ടുണ്ട്. ദീതി കി രസോയിയിൽ നിന്ന് എങ്ങനെ റൊട്ടി ഉണ്ടാക്കാമെന്ന് പഠിച്ചതായും ബെർനാത് കുറിച്ചു.
പരമ്പരാഗത ചെറുധാന്യങ്ങൾ കൊണ്ടുള്ള നിരവധി ഭക്ഷണ പദാർത്ഥങ്ങൾ കേന്ദ്ര സർക്കാർ ജനങ്ങൾക്ക് നിർദ്ദേശിക്കുന്നുണ്ട്. ഇത്തരം ധാന്യങ്ങൾ ആരോഗ്യ ഗുണങ്ങൾ നിരവധിയുള്ളവയുമാണ്. ഇതിന്റെ അടിസ്ഥാനത്തിൽ ചെറുധാന്യങ്ങൾക്ക് കൂടുതൽ പ്രാധാന്യം ലഭിക്കാൻ അന്താരാഷ്ട്ര മില്ലറ്റ് വർഷമായി 2023നെ പ്രഖ്യാപിക്കണമെന്ന ആവശ്യം സർക്കാർ മുന്നോട്ടുവച്ചു. തുടർന്ന് യുഎൻ ജനറൽ അസംബ്ലിയുടെ 75-ാമത് സെഷനിൽ ഇത് അംഗീകരിച്ചു. അതിന് ശേഷമാണ് 2022-2023നെ അന്താരാഷ്ട്ര മില്ലറ്റ് വർഷമായി ഐക്യരാഷ്ട്രസഭ പ്രഖ്യാപിച്ചത്
