ന്യൂഡൽഹി : 2022-23 സാമ്പത്തിക വർഷം ഇതുവരെ ചരക്ക് ഗതാഗതത്തിലൂടെ റെയിൽവേ നേടിയത് മികച്ച വരുമാനം. ആദ്യ 10 മാസത്തിലെ കണക്ക് പ്രകാരം 1.30 ലക്ഷം കോടി രൂപയാണ് റെയിൽവേ നേടിയത്. കഴിഞ്ഞ സാമ്പത്തിക വർഷത്തെ വരുമാനത്തെക്കാൾ 16 ശതമാനം അധികമാണ് ഈ തുകയെന്ന് റെയിൽവേ മന്ത്രാലയം അറിയിച്ചു.
കഴിഞ്ഞ സാമ്പത്തിക വർഷത്തെക്കാൾ ഏഴ് ശതമാനം അധികം ചരക്കുകൾ റെയിൽവേ ഇക്കുറി കൊണ്ടുപോയതായി കണക്കുകളിലൂടെ വ്യക്തമാകുന്നു. കഴിഞ്ഞ സാമ്പത്തിക വർഷം 1,159.08 മെട്രിക് ടൺ ചരക്കായിരുന്നെങ്കിൽ, ഇക്കുറി അത് 1243.46 മെട്രിക് ടൺ ആയി ഉയർന്നു.
2022 ജനുവരി മാസത്തെ അപേക്ഷിച്ച് ഈ വർഷം നാല് ശതമാനം വർദ്ധനയുണ്ടായതായി റെയിൽവേ വ്യക്തമാക്കുന്നു. ജനുവരിയിലെ ചരക്ക് ഗതാഗത വരുമാനത്തിൽ 13 ശതമാനമാണ് വർദ്ധനയുണ്ടായത്. കഴിഞ്ഞ ജനുവരിയിൽ 13172 കോടി രൂപയായിരുന്നു ലഭിച്ചത്. ഇത്തവണ 14907 കോടി രൂപയായി ഉയർന്നു.
റെയിൽവേ വഴി ചരക്ക് ഗതാഗതം വർദ്ധിപ്പിക്കുന്നതിനായി നിരന്തരം പ്രചാരണ പരിപാടികൾ റെയിൽവേ നടത്തിയിരുന്നു. ഇതിലൂടെ ചരക്ക് ഗതാഗതത്തെ റെയിൽവേയുടെ മുഖ്യ വരുമാന മാർഗങ്ങളിലൊന്നാക്കി മാറ്റുകയായിരുന്നു ലക്ഷ്യം.
