ഡൽഹി: രാധാകൃഷ്ണൻ മാത്തൂറിന്റെ രാജി പ്രസിഡന്റ് ദ്രൗപതി മുർമു അംഗീകരിച്ചതിനെ തുടർന്ന് അരുണാചൽ പ്രദേശ് ഗവർണറായിരുന്ന ബ്രിഗേഡിയർ ഡോ. ബി.ഡി മിശ്രയെ ലഡാക്കിന്റെ ലഫ്റ്റനന്റ് ഗവർണറായി നിയമിച്ചു. ഇന്ത്യൻ ആർമിയുടെ മുൻ ബ്രിഗേഡിയറാണ് ബി.ഡി മിശ്ര. ബ്ലാക്ക് ക്യാറ്റ് കമാൻഡോകൾ എന്നറിയപ്പെടുന്ന നാഷണൽ സെക്യൂരിറ്റി ഗാർഡിന്റെ (എൻഎസ്ജി) കൗണ്ടർ ഹൈജാക്ക് ഫോഴ്സിന്റെ മുൻ കമാൻഡറാണ് അദ്ദേഹം.
1993 ഏപ്രിൽ 24-ന് അമൃത്സറിലെ രാജാ സാൻസി എയർഫീൽഡിൽ ഇന്ത്യൻ എയർലൈൻസിന്റെ ഹൈജാക്ക് ചെയ്ത വിമാനത്തിൽ ഓപ്പറേഷൻ നടത്തുകയും രക്ഷാപ്രവർത്തനം വിജയകരമായി പൂർത്തിയാക്കുകയും ചെയ്ത NSG (ബ്ലാക്ക് ക്യാറ്റ് കമാൻഡോസ്) കൗണ്ടർ ഹൈജാക്ക് ടാസ്ക് ഫോഴ്സിന്റെ കമാൻഡറായിരുന്നു മിശ്ര. 124 യാത്രക്കാരെയാണ് വിമാനത്തിൽ നിന്നും മിശ്രയുടെ ടീം രക്ഷപ്പെടുത്തിയത്.
വിമാനം ഹൈജാക്ക് ചെയ്തവരെ വധിച്ചു കൊണ്ടാണ് യാത്രക്കാരെ രക്ഷപ്പെടുത്തിയത്. ആളപായമോ മറ്റ് നഷ്ടങ്ങളോ ഒന്നും സംഭവിക്കാതെ വളരെ കൃത്യമായാണ് ഓപ്പറേഷൻ നടന്നത്. ഈ സംഭവത്തിൽ മിശ്ര വഹിച്ച പങ്കിന് പ്രധാനമന്ത്രിയുടെ അഭിനന്ദനം ലഭിച്ചിരുന്നു. ഇന്ത്യയുടെ വിവിധ യുദ്ധങ്ങളിലും പ്രധാനപ്പെട്ട മേഖലകളിലും മിശ്ര സേവനമനുഷ്ഠിച്ചിട്ടുണ്ട്.
ഇന്ത്യക്കെതിരായ ചൈനയുടെ ആക്രമണത്തിനെതിരെ (1962), നാഗാലാൻഡിലെ നാഗാ കലാപകാരികൾക്കെതിരെ ( 1963-1964 ), സിയാൽകോട്ട് സെക്ടറിൽ പാക്കിസ്ഥാനെതിരെ (1965), ബംഗ്ലാദേശിന്റെ വിമോചനത്തിൽ പാകിസ്ഥാനെതിരെ (1971), പൂഞ്ച് സെക്ടറിലെ നിയന്ത്രണരേഖയിൽ പാകിസ്ഥാനെതിരെ, ബറ്റാലിയൻ കമാൻഡറായി (1979-1981), ശ്രീലങ്കയിലെ ജാഫ്ന, വവുനിയ, ട്രിങ്കോമാലി എന്നിവിടങ്ങളിൽ ഇന്ത്യൻ സമാധാന സേനയുടെ ലീഡിംഗ് ബ്രിഗേഡ് കമാൻഡറായി എൽടിടിഇയ്ക്കെതിരെ( 1987-1988 ), NSG ഫോഴ്സ് കമാൻഡറായി (1990-1995) J &K, പഞ്ചാബിൽ ഭീകരർക്കെതിരെയുമുള്ള പ്രതിരോധങ്ങളിൽ പങ്കെടുത്ത മിശ്ര, വിരമിച്ച ശേഷം കാർഗിൽ യുദ്ധത്തിലും സന്നദ്ധനായി.
Comments